Jaime de Olano anuncia que o Ministerio de Industria autorizou a construción do gasoducto na Mariña

O deputado nacional do PP Jaime de Olano anuncia que, tras superar a laboriosa tramitación administrativa que conlevan estes proxectos, no día de hoxe o Ministerio de Industria autorizou a construción do gasoducto A Mariña. Así o sinala un comunicado remitido polo Partido Popular de Viveiro.

Esta importante estrutura permitirá garantir que a multinacional Alcoa disporá dunha fonte de enerxía máis barata que actualmente, así como tamén resultarán beneficiados todas as empresas e veciños da costa lucense, que poderán desfrutar desta enerxía nos seus negocios e vivendas.

O deputado do PP congratúlase de que o Goberno da nación, neste caso na persoa do ministro Soria, volva cumprir o prometido coa Mariña lucense. Se no seu día se logrou unha tarifa eléctrica competitiva para a multinacional radicada na comarca, o anuncio de hoxe suporá un “espaldarazo” definitivo para o mantemento dos aproximadamente 2.000 postos de traballo que xera esta potente industria, xa que, en palabras da propia emrpesa, isto suporá un abaratamento dos curtes de produción en torno ó 25 por cento, así como o beneficio que aportará á calidade de vida dos mariñáns a utilización dunha fonte de enerxía máis respectuosa co medio ambiente.

Ademais, Olano destacou o gran apoio e impulso na consecución desta infraestrutura levada a cabo desde a Xunta de Galicia, tanto na persoa do seu presidente, Alberto Núñen Feijóo, como por parte dos distintos responsables da Consellería de Industria.