A Mesa denuncia que Génesis Seguros discrimina o galego

A Mesa pola Normalización Lingüística acusa a Génesis Seguros de discriminar o galego e incumprir a lexislación que garante os dereitos lingüísticos dos tomadores de seguros. Esta denuncia ven dada pola formalización telefónica do contrato dunha póliza de seguro obrigatorio para a motocicleta de Serxio o 19 de xaneiro. Na conversa solicitou recibir a póliza do seguro en galego e ante a manifestación da teleoperadora de que non había problema, el aceptou a contratación. Tras recibir a documentación provisional unicamente en castelán, solicitou por escrito até en tres ocasións que lle fose remitida a copia da súa póliza en galego. O tomador púxose en contacto coa Liña do Galego, un servizo da Mesa pola Normalización Lingüística cuxo obxectivo é asesorar, informar e tramitar queixas ou parabéns sobre os dereitos da comunidade lingüística de Galiza; polo que desde A Mesa pola Normalización Lingüística tamén contactaron coa compañía Génesis Seguros á que instaron a respectar a lexislación vixente e tomar as medidas necesarias para garantiren o dereito da súa clientela galega a dispor de toda a documentación e atención relativa aos servizos que teñen contratados coa súa compañía na lingua propia de Galiza.