O PSdeG de Lugo lamenta a “insostible indefensión” que vive López Orozco e amósalle o seu apoio e confianza

Os socialistas esíxenlle aos responsables xudiciais que “velen polo dereito ao principio de inocencia, ademais de garantir o respecto ao segredo de sumario”.

As Executivas do PSdeG provincial e local de Lugo lamentan a “insostible indefensión” e a “continuada presión e exposición pública” á que está sometido o alcalde lucense, José López Orozco, e amósanlle o seu “absoluto apoio” co “total convencemento da súa inocencia, unha vez máis”, como xa se demostrou noutras ocasións anteriormente.

Os socialistas lucenses lembran que a situación de López Orozco “non ten precedentes”, cun comportamento “sempre exemplar” por parte do tamén presidente do PSdeG, que incluso declarou voluntariamente e sempre estivo a disposición da Xustiza para aclarar calquer punto. Esíxenlle aos responsables xudiciais que “velen pola súa honorabilidade e o principio de presunción de inocencia, ademais de garantir o respecto ao segredo de sumario e evitar continuas filtracións interesadas”, ao tempo que solicitan “unha vez máis, que os procesos xudiciais se resolvan co maior rigor e o antes posible”.

Desde o PSdeG censuran “o espectáculo público no que se están a converter moitas accións xudiciais” e lembran que “estas situación fan un grave dano que se prolonga no tempo e que despois, sexa cal sexa a resolución, ten unha pegada inxusta e irreparable”, polo que se suman á petición de amparo do rexedor lucense ante a titular do Xulgado número 3 de Lugo.