O socialista Sánchez Presedo votará en Bruxelas en contra do protocolo pesqueiro con Mauritania

A comisión de Pesca do Parlamento Europeo votará este mércores pola tarde o protocolo entre a UE-Mauritania. O eurodeputado socialista e membro da comisión de Pesca, Antolín Sánchez Presedo, explicou que a importancia do acordo e os problemas que plantexa impiden un voto favorable na Comisión de Pesca do Parlamento Europeo. “Somos conscientes de que a flota española está moi interesada en continuar coa actividade na zona, pero a proposta de protocolo supón un deterioro das condicións técnicas e económicas e a expulsión da flota cefalopodeira”.

Sánchez Presedo destacou a flota dos Estados membros faena na zona dende fai 50 amos, que o primeiro acordo pesqueiro da UE con Mauritania data de 1987 e que o novo Protocolo de Pesca UE-Mauritania rubricado o 26 de xullo pasado por un período de dous anos e pendente de ratificación polo Parlamento Europeo, é o máis importante dos acordos internacionais da política pesqueira europea. Sen embargo, “a revisión do protocolo debe abordar todas estas cuestións posto que, pese a avanzar xa nalgúns problemas nas reunións bilaterais mantidas quedan aínda outros pendentes de solución e temos que ser firmes para enviar unha mensaxe clara, tanto á Comisión Europea coma ás autoridades de Mauritania de que deben esforzarse por resolvelos para que o Parlamento Europeo poida dar a súa aprobación”, sinalou.

Trato discriminatorio fronte a terceiros países
Así mesmo, o eurodeputado socialista interesouse pola existencia de “trato discriminatorio” á flota europea. En dúas preguntas á Comisión Europea, Sánchez Presedo cuestiona se as prácticas de reabandeiramento baixo pavillón mauritano e a existencia de acordos privados entre o país africano e flotas procedentes de terceiros Estados se axustan ós principios establecidos no novo protocolo de pesca.

Por iso, pregunta á CE pola evolución da flota cefalopodeira que opera en Mauritania dende que existen relacións pesqueiras coa Unión Europea e urxe á autoridade comunitaria a que emprenda accións en aras de asegurar unha maior transparencia.
Igualmente, pregunta sobre a existencia dun acordo asinado entre Mauritania e Rusia para a flota peláxica cunha cota inferior á establecida para a UE. “De acordo co Protocolo asinado coa UE, todo terceiro estado debe estar suxeito ás mesmas condicións establecidas para a flota europea”, sinalou Sánchez Presedo.