O Concello de Barreiros conta cunha nova rede de abastecemento de auga

Barreiros, 6 de xuño de 2013. Nas últimas horas entrou en funcionamento a nova rede de abastecemento de auga desde a depuradora da Barranca ata o centro de San Miguel. Segundo explica o alcalde, Alfonso Fuente, trátase dunha nova canalización que substitúe á de fibrocemento vella e que mellorará o subministro ás parroquias de San Cosme, San Pedro e Reinante. O rexedor pide disculpas polos problemas xurdidos, xa que nalgún momento a auga saíu turbia. O investimento nestas obras, que se prologaron por espazo dun mes, ascendeu a 200.000 euros.

Fuente Parga relatou que “onte en Barreiros entraba en servizo a nova de rede de abastecemento de auga desde a depuradora da Barranca ata o centro de San Miguel. Trátase dunha canalización de maior sección que substitúe á vella que era de fibrocemento, que daba moitos problemas e que rexistraba moitas fugas”. Para o alcalde barreirense “despois de ter limpado o embalse e de ter mellorado a depuradora de San Miguel había que facer esta obra para achegar a auga en maior caudal a San Miguel. Pero non só a esta zona, xa que esta depuradora é capaz de abastecer tamén ás parroquias de San Cosme, San Pedro e Reinante. Estase a dar servizo a toda a costa, cunha auga que ven por peso, por caída e que ven desde o río”.

O rexedor pediu disculpas “polos problemas que se produciron na tarde de onte e que seguiron esta mañá porque a moita xente lle saíu a auga turbia, debido ao barro que contiña a canalización tras acometer as obras pertinentes. Quero pedirlles aos veciños que si ven que lles sae a auga turbia, que abran un pouco as billas para ir purgando pouco a pouco a rede. Este é un inconveniente xurdido de ditas obras na rede”.
Alfonso Fuente Parga subliñou que “estas obras se acometeron agora para que no verán non se produzan problemas, teñamos maior caudal de auga e en mellores condicións. A canalización de fibrocemento había que sacala porque era obsoleta e incluso se recomenda o seu cambio por motivos sanitarios”.

O investimento ascendeu a preto de 200.000 euros. Agora restan as obras de acondicionamento da cuneta, que se preparará en formigón para ir rematando coa totalidade destes traballos. O alcalde de Barreiros engadiu que “esa nova canalización ven directa desde a depuradora ata o centro de San Miguel sen entronque ningún, a diferenza da vella que tiña os entronques de todas as casas da zona da Barranca, agora esas casas van por outra canalización independente. Cando antes se producía unha fuga nun entronque dun veciño da Barranca había que cortar o subministro a toda a parroquia, pero agora iso non pasará”.