O PSdeG de Lugo esixe que a Xunta informe dos plans de número de mestres e servizos escolares a só 15 días do final de curso

Os socialistas piden “que por unha vez as cousas se fagan ben e os pais e a comunidade escolar sexan informados e poidan opinar” en lugar de “tomar todas as decisións por decretazo, sen consenso e fóra do calendario escolar”

O PSdeG de Lugo esíxelle á Xunta que informe sobre os plans de número de profesores, os servizos de comedor e transporte ou o funcionamento dos centros educativos para o vindeiro curso, “a só 15 días de que remate o actual sen que os pais e a comunidade escolar saiban aínda que vai pasar”. A estas alturas “aínda non se sabe cantas unidades e profesores haberá nin como funcionarán os servizos, algo que afecta en toda a provincia e moi especialmente nas zonas do rural”, afirma so secretario provincial de Educación, Carlos Ferreiro, que pide “que por unha vez as cousas se fagan ben, os pais e a comunidade escolar sexan informados e poidan opinar”. Os socialista pide que “o goberno do PP non volva tomar todas as decisións por decretazo, sen consenso e fóra do calendario escolar”.

“Xa nos teñen acostumados a facer as cousas por detrás, en época de vacacións e cando a comunidade escolar non ten capacidade de mobilización, e nestes momentos de incertidume, con recortes, decretos como o dos comedores e dúbidas co transporte, os pais e nais e os profesores teñen dereito a recibir información veraz e completa”, afirma Ferreiro, que lembra que as ANPAS levan meses solicitando reunións co xefe territorial de Educación sen obter resposta.

Mapa de centros
Por outra banda, o socialista insiste, na liña do que vén reclamando o partido nos últimos meses, en que se o plan real da Xunta é modificar o mapa de centros da provincia “o PSdeG está disposto a falar cun plan sensato e consensuado” pero “o que é intolerable é que se estean pechando centros desde un despacho e sen consultar con ninguén, como sucede co IES As Mercedes, e que traten de modificar o mapa de centros a golpe de decretazo”. O propio PP recoñeceu hai uns días no Parlamento que non descarta unha modificación deste mapa a curto prazo, polo que os socialistas insisten en que “de ser así, deben contar coa comunidade educativa e a oposición, antes de que cheguen novos golpes ao rural e á educación pública de calidade na provincia”.