O C.C. Buril solicita a declaración de Ben de Interese Cultural para as pinturas da igrexa da Vila do Medio

O Colectivo Cultural Buril solicitará á Dirección Xeral de Patrimonio, dependente da Consellaría de Cultura da Xunta da Galiza, a declaración de Ben de Interese Cultural en calidade de monumento, para as pinturas e igrexa da Vila do Medio. Do mesmo xeito, tamén solicitará ao Concello de Burela que trate este asunto no próximo pleno municipal, ao entender que se trata dunha cuestión de grande importancia para Burela.

A presidenta do Buril, Rosana Valle, e o seu secretario, Senín Díaz Mon, mantiveron este mesmo luns unha xuntanza con representantes dos tres grupos políticos con representación no Concello, na que expuxeron a proposta do Buril para debate en pleno e solicitaron o seu apoio á solicitude para declarar Ben de Interese Cultural as pinturas da Igrexa da Vila do Medio. Rosana e Senín cualificaron a xuntanza de moi positiva e agardan que o apoio da Corporación Municipal se faga efectivo no próximo pleno que terá lugar neste mesmo mes de xullo.

As pinturas murais da Igrexa da Vila do Medio constitúen unha obra de grande importancia histórica, artística e patrimonial, non só para Burela, senón tamén para a arte galega en xeral. Estas pinturas veñen padecendo un importante proceso de deterioro desde que foron descobertas a principios dos anos 70 do pasado século, presentando actualmente un estado de conservación que urxe unha rápida actuación para garantir a súa preservación ao longo do tempo, así como para a súa posta en valor como parte fundamental da nosa história artística e cultural.

O Buril traballa na promoción e defensa da cultura galega en todas as súas manifestacións, desenvolvendo ao longo dos seus case 30 anos de vida distintas actividades encamiñadas a preservar e pór en valor o noso patrimónico cultural, facendo unha aposta nestes últimos anos polo estudo e difusión da história local, con especial atención a aqueles aspectos máis destacados de Burela e da Mariña.

O pasado ano 2012, dentro das II Xornadas de História Local de Burela, realizamos unha visita guiada ás pinturas da Vila do Medio, a cargo da historiadora da arte Lucia Bouza, onde puidemos constatar in situ o precario estado de conservación que presenta esta “pequena xoia” da pintura medieval galega, sendo algunha das escenas pictóricas practicamente irrecuperábel.

Co fin de pór remedio a esta situación que pon en perigo a preservación destas pinturas, o Buril presentará solicitude ante a Consellaría de Cultura, Educación e Ordenación Universitaria da Xunta de Galiza, para que as pinturas e a igrexa da Vila do Medio sexan declaradas Ben de Interese Cultural, de acordo coa Lei 8/1995, de 30 de outubro, do Patromonio Cultural de Galiza.

Paralelamente a esta solicitude, desde o Buril impulsaremos distintas actividades relacionadas coas pinturas da Vila do Medio e a súa declaración como Ben de Interese Cultural para dar a coñecer esta iniciativa entres os distintos sectores sociais de Burela. Todas estas iniciativas encádranse dentro dunha serie de actividades que se programarán con motivo do 30 aniversario do Colectivo Cultural Buril.