Compoñentes actuais e antigos da Banda de Música Municipal de Foz ofrecerán un concerto para celebrar os seus 20 anos

Foz, 6 de agosto de 2013. O vindeiro venres, 9 de agosto, a banda de música municipal de Foz celebra o seu 20 aniversario cun concerto especial, no que actuarán tanto compoñentes actuais como antigos.

O fundador da banda de música municipal de Foz, Arcadio Mon, explicou que o concerto vai consistir “en celebrar os 20 anos que facemos agora polas festas de Foz, cando dimos o primeiro concerto no 1993. O que vamos tratar é de tocar case a mesma música que fixemos por aquel entón e recuperar tamén moitos músicos que tocaban naquel momento. A parte, tamén sacamos unha revista conmemorando un pouquiño o acto con fotografías destes anos e con entrevistas, tamén recollemos o punto de vista dalgunha persoa interesante de Foz, coas súas opinións sobre a banda, sobre a importancia que ten culturalmente no pobo… O concerto vai a ser moi especial porque vai recordar sobre todo a música que facíamos naquela época”.

Os 30 compoñentes actuais da banda estarán acompañados nese día de ó redor de dez anteriores integrantes. Segundo sinala Mon, “a banda foi crecendo, empezamos pouquiños, sobre 20 ou 25, e despois foi crecendo cada vez máis, chegando a ser 50 nalgún momento, aínda que agora baixan un pouco. Todas as asociacións ou os grupos así teñen momentos de máis auxe, volven baixar un pouco, pero a banda sempre tivo sobre 35 ou 40 membros”.

Como balance destes 20 anos, o músico di que “para a banda e, sobre todo, para o pobo de Foz, eu creo que é moi positivo, porque penso que para unha vila coma esta ter unha banda de música, coa tradición que había aquí, que era practicamente cero musicalmente, sobre todo en bandas de música, eu creo que é moi positiva. E tamén para os nenos, para a xente, para min e para todos os compoñentes da banda”.
Arcadio Mon invita á xente ó concerto do día 9 porque nel, “os de agora van escoitar un concerto un pouco distinto, moi festeiro, porque como estamos de festa tamén queremos celebralo e vamos a tocar música bastante alegre, porque non queremos poñernos con obras moi tristeiras. Que vaian alí porque recordaremos os tempos pasados, haberá algunha sorpresa e penso que pasaremos un rato moi agradable unha hora moi agradable”.

O concerto terá lugar o vindeiro venres, 9 de agosto, a partires das 20:30 horas no patio do colexio nº 1. O acto conta coa colaboración da Asociación de Comerciantes, Industriais e Autónomos e do Concello focense.