Paisaxe e paisanaxe

O Complexo Cultural Regal Xunqueira, en Viveiro, acolle a inauguración dunha nova exposición coas obras de Otero Regal. Nesta ocasión, ‘Paisaxe e paisanaxe’ recolle 30 cadros e 6 esculturas en cerámica de alta temperatura policromadas con óxidos, esmaltes e engobes cun contido moi chamativo e cheo de cor realizadas dende o 2007 ata o 2013 nunha mostra que será inaugurada este xoves 8 de agosto ás 20:00 horas. Ata o 30 de setembro poderase ver unha obra de Otero Regal de paisaxes cerámicos: o que el veu o redor de si, en viaxes, vivindo en lugares moi diversos e sobre todo tomando centos de apuntes dende O Cairo a Tunicia, pasando pola Andalucía máis branca, Cataluña, Castela… e mirando sobre todo a perspectiva das casas, moi poucas das paisaxes están sen casas. Esta mostra está feita para que voltemos a esta exposición que quere ser punto de encontro con outras artes, con outros laboríos. Otero Regal atópase, ós 61 anos, algo máis canso; pero na mellor quenda de toda a súa historia polo que fai o tempero artístico. Nunca creou con máis oficio, que o ten todo, con ese saber facer, con ese aquel de artesán sabio, que so un mestre, na súa obra pode bordar.