Os grupos municipais do PP, PSdeG e BNG de Lourenzá presentan unha moción conxunta relativa a transferencia da estrada municipal “Camiño A”

D. César Docampo Fernández, na súa calidade de voceiro do Grupo Municipal do Nacionalista, Dona Rocío López García, na súa calidade de voceira do Grupo Municipal Socialista e Dona Guadalupe Flórez Seivane, na súa calidade de voceira do Grupo Municipal Popular, ó abeiro da lexislación vixente, presenta, para o seu debate e aprobación se procede na vindeira sesión ordinaria que celebre a corporación municipal, a seguinte

MOCIÓN RELATIVA A TRANSFERENCIA DA ESTRADA MUNICIPAL COÑECIDA COMO “CAMIÑO A” DA ZONA DE CONCENTRACIÓN PARCELARIA LOURENZÁ SUR

EXPOSICIÓN DE MOTIVOS
A Xunta de Goberno Local na sesión celebrada o 17 de marzo do 2005 adoptou o acordo de transferir á Excma. Deputación de Lugo a titularidade do Camiño A da zona de concentración parcelaria de Lourenzá Sur, polígonos 4 e 9 que vai dende a parroquia de Santo Adrao, lugar de Lanzós ata a parroquia de San Xurxo, lugar de Outeiro, con lonxitude de 2,8 quilómetros e que enlaza a vía provincial CP 2801 que vai de Santo Tomé a Augaxosa coa estrada autonómica LU 122 que vai dende Paraxes a Lourenzá.

Este acordo, ratificado por unanimidade no Pleno do Concello realizado o 1 de abril do 2005, foi motivado polo feito de que, dada a idoneidade do seu trazado, esta vía converteuse nunha prolongación da estrada provincial antes mencionada e tendo en conta a gran afluencia de tráfico que rexistra, o Concello se vía imposibilitado para proceder ao seu mantemento dado o elevado custo que elo supón.

Posteriormente o 19 de maio do mesmo ano, a Excma. Deputación Provincial comunica ao Concello a aceptación da proposta propoñendo que o Concello asuma o tramo urbano da CP 2801 de Santo Tomé a Mazo, pasando por Santo Adrao e Augaxosa e que queda con menos tráfico entre os p.k. 0.000 e 1.081, desta maneira deixa de ser unha cesión e pasa a ser un dobre cambio de titularidade de bens de uso público entre ambas Administracións. Este acordo foi levado a pleno o 18 de xullo do 2005 e aprobado cós votos da maioría do pleno pertencentes ao Grupo Municipal Popular e coa abstención dos grupos da oposición.

Con data 13 de marzo do 2006 o concello de Lourenzá recibe a certificación do acordo de aprobación de dobre cambio de titularidade adoptado por unanimidade polo pleno da Excma. Deputación con data 27 de febreiro do ano 2006.

Dende ese momento o Concello de Lourenzá urbanizou o tramo que asumira, con distintas axudas, algunha delas con cargo ao Plan de Obras e Servizos da Exma Deputación e pola súa banda a Deputación de Lugo incorporou á rede provincial o tramo transferido como así consta no informe emitido por esta con data 24 de Outubro do 2006 a este Concello.

Neste mesmo informe comunicaba que se rexenerara na primeira quincena de agosto un 80% do tramo en cuestión e que se propoñía con cargo a primeira posibilidade orzamentaria da que se dispuxera ampliar a sección transversal de 6 m. de plataforma ata os 9 m. que consideraba adecuado ao tráfico que soporta.

Se ben é certo que non se chegou a asinar o convenio de dobre cambio de titularidade, por parte da Deputación cobráronse tanto a particulares como ao propio Concello o importe de licenzas municipais, fíxose o mantemento da vexetación lateral así como se procedeu a colocar os PK que posteriormente o mesmo Ente retirou.

Con todo isto poñémonos no ano 2012 sen ter regulada esta situación, por ese motivo o Pleno Municipal en sesión ordinaria celebrada no mes de Agosto acorda por unanimidade das tres forzas políticas instar a Excma. Deputación a regularizar a situación procedendo a asinar o convenio necesario para facer efectivo o dobre cambio de titularidade.

Así mesmo o 31 de outubro do 2012 o pleno da Excma. Deputación Provincial adoptou o mesmo acordo por unanimidade.

Finalmente o 10 de maio do 2013 recibe este Concello o borrador do Convenio para a transferencia mutua de vías no que figura na Cláusula Cuarta a condición de que “sempre que, previamente, realice o Concello de Lourenzá, á súa costa, as obras de acondicionamento e mellora do treito”.

A vista disto, tendo en conta que non se concretaba nas actuacións esixidas e, estando tramitando Augas de Galicia o deterioro que por mor das riadas do mes de xaneiro sufre a vía no lugar de Sendín na ponte sobre o río Batán, considerouse oportuno remitir o proxecto técnico a fin de que fora eliminada a cláusula citada no parágrafo anterior.

O 19 de Xuño do corrente recíbese no Concello informe sobre o convenio de transferencia de estradas esixindo non só o arranxo da ponte antes mencionada, senón que esixe:
– regulación do firme existente e posterior afirmado con mestura bituminosa en quente,
– apertura de cunetóns,
– limpeza de taxeas,
– pintado de liñas reflectantes e colocación de “ollos de gato”,
– construción de variante para realizar a intersección có P.K. 31 da estrada comarcal LU 122

Tendo en conta que aos tres grupos que encabezan esta moción nos parece esaxerado e fóra de lugar as esixencias impostas, xa que rachan co fin último que se pretendía ao inicio das negociacións no ano 2005 propónselle ao Pleno do Concello de Lourenzá a adopción do seguinte

ACORDO

1. Eliminar a cláusula cuarta do borrador remitido ao Concello con data 10 de maio do presente para a transferencia mutua de vías.

2. Asinar o convenio, coa modificación mencionada no punto 1, no prazo máximo de 1 mes transcorrido dende a data de finalización da obra que está executando Augas de Galicia na estrada denominada como Camiño A.

O que se traslada ó Pleno da Corporación Municipal ós efectos indicados, en Lourenzá, a 9 de agosto do 2013.