O PP burelés, satisfeito co acordo da Xunta sobre o acceso ó porto

Burela, a 8 de setembro de 2013.- O portavoz da Agrupación Local do Partido Popular de Burela, José Luis Lois Losada, manifestou este domingo a satisfacción do partido logo do anuncio do Presidente da Xunta de Galicia, Alberto Núñez Feijóo, do acordo do Consello da Xunta de decretar a urxente ocupación dos terreos precisos para levar a cabo as obras de acceso ó porto burelés.

Lois Losada indicou que “a palabra do Presidente da Xunta, e o acordo do Consello, son palancas decisivas para que esta obra sexa xa unha realidade, xa que o espazo portuario e Burela precisan urxentemente da mesma. Confiamos plenamente na palabra de Núñez Feijoo e sabemos que 2014 será o ano do acceso ó porto”.
O portavoz da Agrupación Local burelesa tamén se referiu á aprobación provisional do PXOM: “é unha gran noticia que culmina dous anos de intenso traballo do alcalde, José María González Barcia, e do seu Equipo de Goberno, e que abre as portas ó futuro do noso concello. Non podemos esquecer que o PXOM vén a ser algo así como os cementos sobre os que se constrúe un edificio”.

Lois Losada afirmou que “estes dous asuntos, acceso ó porto e PXOM, demostran ás claras que nin o alcalde nin o seu equipo estiveron parados durante estes dous anos. Todo o contrario, houbo un traballo calado pero intenso, serio e sen pausa, que agora dá os seus froitos”. Lois Losada manifestouse convencido de que “o alcalde, cando di que se vai pechando o círculo dos grandes asuntos que ten plantexados Burela, é que está seguro do que di e que así será, como se demostra con estes dous asuntos de grande relevancia para os veciños e veciñas do noso concello”.