Lugo, 17 de setembro de 2013. A Vicepresidencia da Deputación de Lugo colabora, un ano máis, coa Federación Galega de Tríatlon e Péntatlon Moderno, a través dun convenio de colaboración que veñen de asinar o vicepresidente da institución provincial, o nacionalista Antonio Veiga, mailo presidente da Federación, Francisco Villanueva, polo que a área provincial de Benestar Social e Deporte aporta 24.000 de cara a promoción desta modalidade deportiva nos centros escolares das comarcas de Lugo.
Neste sentido, Antonio Veiga afirmou que “aínda que a priori semella un deporte minoritario, en Lugo o Tríatlon e o Péntatlon Moderno gozan dunha ampla implantación e ano a ano vannos dando alegrías ao mundo do deporte lucense, ademais de facer que moitos rapaces e rapazas se acheguen a esta modalidade deportiva, un dos obxectivos primordiais para a área de Benestar Social e Deporte da Deputación de Lugo”.
Así mesmo, o vicepresidente da Deputación destacou que “este convenio coa Federación Galega de Tríatlon e Péntatlon Moderno asínase nun momento significativo para este deporte, xa que o ferrolán Gómez Noya vén de proclamarse campión do mundo por terceira vez na súa carreira como triatleta, tras gañar a gran final das series mundiais”.
A área de Deporte da Deputación de Lugo vén mantendo constante colaboración coas Federacións deportivas Galegas no camiño de apoiar economicamente iniciativas de promoción do deporte desde a base, facendo especial fincapé naquelas modalidades que se cadra se consideran minoritarias pola súa repercusión mediática pero que, non obstante, en Lugo ou Galiza teñen un gran número de practicantes.