O BNG pide unha resposta social contundente para frear a privatización e desmantelamento dos servizos sanitarios públicos

A Mariña, 10 de decembro de 2013. O BNG da Mariña deu os seus parabéns ao persoal sanitario polo éxito dunha folga xeral en Galiza que non so demanda por freo á políticas de degradación do sistema sanitario público con efectos directos nas traballadoras e traballadores do sector, tamén vai en beneficio do conxunto da sociedade para xa que busca parar a súa privatización. A organización nacionalista mariñá anunciou a súa presenza na manifestación que sairá este martes ás 20:30 do Hospital da Costa de Burela.

Para o BNG mariñao, na nosa comarca debemos saír á rúa para frear a degradación e privatización da sanidade pública, mais tamén para demandar a derrogación do decreto de xestión integrada provincial e a súa substitución por un modelo de xestión sanitaria de ámbito comarcal. Argumentan que a sanidade da Mariña non pode ser xestionada dende o descoñecemento e o desprezo que está demostrando o xerente provincial cunha comarca que ten entidade suficiente para contar cun sistema de xestión integrada propio.

Para os e as nacionalistas mariñaos estamos diante dun proceso de degradación calculada do sistema sanitario público con medidas como os repagos de medicamentos, próteses ou ambulancias que afectan sempre á parte mais débil da sociedade como son os e as pensionistas, enferm@s crónic@s e a xente con menos recursos.

O Partido Popular, tanto no goberno da Xunta como no Estatal, está aplicando unha auténtica “contrarreforma do sistema sanitario público co fin de privatizalo e entregalo nas mans das grandes corporacións financeiras e aseguradoras”. Non é de recibo que a administración pública sexa a gran valedora da sanidade privada, derivando como o fai aos centros privados, ás persoas que deberan recibir asistencia no sistema público, moito menos facelo naqueles servizos que maior beneficio lle reportan ás empresas privadas dedicadas ao sector.

O BNG parabeniza ás traballadoras e traballadores da sanidade pública polo éxito da convocatoria da folga destes dous días, nun esforzo loábel por defender o sistema sanitario público contra un proceso de privatización planificado e continuado por parte dos gobernos galego e estatal, seguindo a estela deixada por comunidades gobernadas polo Partido Popular como Valencia o Madrid.