Paulo Carlos López afirma en Lugo que “Galicia terá voz propia en Europa a través de Compromiso por Galicia”

Lugo, 3 de maio 2014.- O cabeza de lista de Compromiso por Galicia ás eleccións ao Parlamento Europeo, Paulo Carlos López, e o presidente do EAJ/PNV, Andoni Ortúzar ofreceron este mediodía no Gran Hotel de Lugo unha charla sobre “A Europa que queremos”, na que coincidiron en reclamar unha Europa dos pobos “que poña por diante os intereses da cidadanía e na que os galegos ou os bascos teñamos peso nas institucións europeas para defender os intereses dos nosos pobos, como o sector lácteo ou a nosa pesca”.

Nete sentido, o candidato de Compromiso subliñou que “Galicia terá voz en Europa a través de Compromiso por Galicia, a través de Coalición por Europa, que será a única candidatura nacionalista con presenza segura no Parlamento Europeo a través unha forza galeguista”.

En declaracións aos medios ante do acto, Paulo Carlos López tamén salientou que “as súas forzas compartimos unha idea de Europa máis social, na que se blinden tanto a sanidade como a educación públicas; unha Europa máis democrática, con máis peso do Parlamento Europeo en lugar dos órganos que representen os Estados”.

Andoni Ortúzar: “O PNV identifícase moito con Compromiso por Galicia, unha forza nova e ilusionante”
Pola súa parte, o presidente do PNV, Andoni Ortúzar, afirmou que “o PNV está a estreitar relacións con Compromiso por Galicia, unha forza nova e ilusionante coa que nos identificamos moito porque atopamos no seu ideario e na súa forma de ver Galicia e entender a política e a Unión Europea moitos puntos en común co que defende o PNV para Euskadi, para o Estado español e para Europa”.

Neste sentido, Andoni Ortúzar coincidiu co candidato de Compromiso por Galicia en que “Europa non pode ser a dos axustes, a dos restricións e a que se esquece da xente. Ten que ser xusto o contrario”.

Así, avogou por “unha Unión Europea que constrúa unha sociedade máis xusta, máis equilibrada e progresista; que Europa volva ser ese espazo común de progreso, de liberdadades e de democracia, como foi no seu inicio e que agora se está perdendo”.

A este respeito, o presidente do PNV sinalou que “a crise internacional puxo de manifesto que a Europa dos estados fracasou, non funciona, e por iso nós propomos a Europa dos pobos”.

“Cremos -concluíu- que a mellor maneira de achegar Europa e de recuperar a confianza da cidadanía nas institucións comunitarias é que os galegos, os bascos ou os cataláns a sintan como unha proxección propia, pero para iso temos que ter unha representación digna nos órganos de decisión europeos”.