Dan comezo as festas patronais de Burela con dez días repletos de actividades

Burela, 23 de maio de 2014. Hoxe pola tarde dan comezo as festas patronais de Burela. Por diante hai dez días de repletos de actividades culturais, deportivas e musicais. O alcalde, José Mª González Barcia, deséxalles uns felices festexos os seus veciños e veciñas.

O rexedor lembraba que “hoxe arrancan oficialmente as nosas festas patronais, coa misa que se vai celebrar na igrexa da Vila do Medio a partires das nove da tarde e a posterior procesión de baixada das imaxes dende a igrexa da Vila do Medio á actual parroquial. Empezan dez días intensos para os cidadáns que vivimos en Burela e para os visitantes, que estou completamente seguro de que van chegar a Burela nos próximos días. En definitiva empezan dez días nos que se van mesturar os sentimentos relixiosos coas emocións, co aspecto lúdico e co festivo”.

González Barcia dixo: “dende o Concello, como representante de tódolos veciños e veciñas, doulles os meus parabéns a tódolos cidadáns, desexándolles que pasen os mellores días posibles e tamén desexándolles aos visitantes, que estou seguro de que os vamos saber acoller como sempre fixemos, é dicir excelentemente ben, que pasen uns días agradables entre nós”. O alcalde agarda que “o tempo nos axude e, por suposto, recoñecer o traballo de todas as persoas que dun xeito ou doutro colaboran coas festas: dende as persoas que, participando de forma activa na comisión de festas ou colaborando con ela, foron capaces de organizar un programa máis que digno para o noso concello, porque nos momentos actuais que corren, de dificultade económica, poñerse ao fronte dunha comisión de festas non é nada doado; ás persoas que traballan día a día e que elaboran as alfombras florais, que merecen un auténtico monumento polo recoñecemento ao traballo que fan, que é calado e xordo pero que despois vamos poder gozar todos del; tamén ás persoas que colaboran economicamente coa comisión de festas; e, por suposto, a tódolos veciños e veciñas do noso concello, que son os que fan posible que as nosas festas sexan unhas das máis grandes de toda a comarca e de toda a provincia”.

O alcalde burelés engadiu: “desexamos pasar estes días da mellor forma posible, intentando gozar e esquecernos un pouco dos problemas cotiáns que a vida nos presenta día a día, na seguridade de que se enfocamos as festas con ilusión tamén enfocamos o futuro coa mesma ilusión. Felices festas a todos”.
O pregón será pronunciado mañá, sábado, ás 19:30 horas na Casa da Cultura polo xornalista de TVE Jenaro Castro. Un dos días grandes será o 31 de maio, data na que se confeccionará a grande alfombra floral pola que discorrerá a procesión ata o porto.