Do 4 ó 6 de xullo celebrarase o quinto Torneo de Fútbol 8 sénior Vila de Foz que reparte 1.600 euros en premios

Foz, 17 de xuño de 2014. O alcalde focense, Javier Jorge Castiñeira, participou na presentación da quinta edición do torneo de fútbol 8 sénior Vila de Foz, que se celebrará do 4 ao 6 de xullo no estadio Martínez Otero e repartirá 1.600 euros en premios. Está organizado pola Peña Ñasss coa colaboración do Concello.

O rexedor municipal destacou que “a novidade con respecto a outros anos é que se vai realizar nun campo de herba natural, no Martínez Otero, que está no centro da vila. Para premios destínanse 1.600 euros en metálico: 1.000 para o gañador, 400 para o segundo clasificado e 200 para o terceiro, aparte dos trofeos. Neste caso o Concello de Foz colabora, como o fai con case todas as actividades deportivas e culturais que se desenvolven no noso concello. É interesante porque é un torneo que atrae a moita xente, non só aos participantes senón tamén aos que veñen a velo”.

Javier Castiñeira agradece “á Peña Ñasss pola súa organización e tamén a aqueles patrocinadores que axudan ao financiamento deste evento, co que se inician os primeiros actos deportivos do verán”.