Como anunciara o presidente de Pasada das Cabras horas antes no programa da Radio Galega “Coñecer Galicia”, medio centenar de caminantes participaron este sábado 19 de xullo na ruta nocturna de Burela a San Cibrao, un clásico das camiñatas no verán mariñán. A pesar dos constantes aguaceros que caeron na xornada, nas dúas horas que tardaron en chegar a San Cibrao non caeu unha soa gota. Ademais, acompañounos unha temperatura agradable e, incluso, puideron apreciar un ceo totalmente estrelado cando alcanzaron o polígono industrial da Península da Paz. O Noso Lar de San Cibrao preparou unha chocolatada con churros para repoñer forzas. Despois, a maioría fixeron o retorno en coche; pero, uns poucos, os máis en forma, repetiron a camiñata cara a Burela, chegando ás 4 da madrugada. A vindeira saída será o domingo 3 de agosto e a ruta a realizar é a do Río Masma en Lourenzá, atendendo unha invitación dos amigos da asociacion Terras de Lourenzá.
Ruta nocturna de Burela a San Cibrao