González Barcia subliña que as actuacións a realizar en Burela que avanzou o Presidente de Xunta suporán “un avance significativo para a economía e a calidade de vida dos cidadáns de Burela e A Mariña”

Burela, 23 de setembro de 2014. O alcalde, José Mª González Barcia, valora de xeito moi positivo a visita que onte cursou á Mariña o presidente da Xunta, Alberto Núñez Feijoo.

Para o rexedor burelés “todos os asuntos vencellados con Burela aos que aludiu, ratifican o seu compromiso con esta comarca en xeral e co noso concello en particular, como o demostra a referencia que fixo aos accesos o porto, obras que comezarán nos prazos previstos, e tamén ao Hospital da Costa. O presidente da Xunta dixo que as obras deste centro poderían licitarse en 2015. Alberto Núñez Feijoo fixo anuncios concretos sobre actuacións moi importantes para o noso concello”.

Sobre o obradoiro que o Concello de Burela comparte cos de Cervo e Xove José Mª González Barcia sinalou que “estamos moi satisfeitos de cómo está a funcionar a colaboración con Xove e con Cervo”. E engadiu que “as actuacións que están a levar adiante @s alumn@s de pintado de sinalización horizontal nalgunhas rúas de Burela e nalgúns edificios municipal demostran a preocupación do equipo de goberno por manter en condicións óptimas de ornato a nosa vila”.

Barcia finalizou agradecéndolle á Xunta a súa colaboración permanente co Concello de Burela a través da financiación dos obradoiros de emprego e dos cursos de formación de desempregados, sinalando que “sen a axuda da Xunta, seríanos imposible poder facer nada ao respecto”.