As San Lucas, as feiras máis antigas de Galiza, chegan á súa 858 edición mantendo o tradicional mercado cabalar como un dos seus emblemas

Lugo, 1 de outubro de 2014. A sala de exposicións do pazo de San Marcos acolleu este martes a presentación da Feira das San Lucas de Mondoñedo, que se celebrarán na cidade episcopal entre o 16 e o 20 de outubro e coas que volve colaborar a vicepresidencia da Deputación. Na posta de longo da nova edición das feiras máis antigas de Galiza participaron o vicepresidente do organismo provincial, Antonio Veiga; o alcalde de Mondoñedo, Orlando González Cruz; o presidente da comisión de festas das San Lucas, Miguel Souto Cabana; e a tenente de alcalde mindoniense, Esperanza González.

Antonio Veiga destacou na súa intervención que “nas Feiras e Festas das San Lucas, que son as máis antigas da Galiza, poderemos gozar da tradición e da modernidade, e dun programa excelente de catro días que vai congregar a moitísimos mariñáns e xente chegada de todos os lugares. Desde a área de Cultura da Deputación colaboramos, como non podía ser doutro xeito e como facemos con tantas outras, cunhas festas moi arraigadas na nosa tradición para que un ano máis sigan promovendo os nosos valores culturais e tradicionais, e tamén sirvan de motor económico”, salientou o vicepresidente.

Pola súa banda, o presidente da comisión, Miguel Souto, explicou que a As San Lucas acadan a súa 858 edición manténdose no século XXI fieis á tradición e tentando ser “unha aposta pola dinamización cultural, económica e social de Mondoñedo e a provincia”, subliñou. Igualmente, puntualizou que se marcan o obxectivo de que “Mondoñedo volva ser o 18 de outubro esa capital que foi no antigo reino de Galiza, e queremos que os galegos e galegas se sintan orgullosos de ter unha das feiras máis antigas de Europa, que as disfruten e as sintan súas”, concluíu.

Programa variado
A comisión preparou un programa con múltiples actividades, pero nas que o mercado cabalar segue tendo un papel preponderante. As festas arrincarán oficialmente o xoves, día 16, co pregón, que nesta ocasión correrá a cargo do mindoniense Antón Meilán García, un estudioso do Mariscal Pardo de Cela, sobre o que escribiu as obras O Mito do Mariscal Pedro Pardo de Cela e O último ano do Mariscal Pedro Pardo de Celta: O cerco e a traizón da Frouxeira”. Por isto, a ofrenda floral a persoeiros ilustres da cidade episcopal farase ante a tumba do Mariscal na Catedral de Mondoñedo.

O sábado 18 celebrarase o Día Grande, cos cabalos como principais protagonistas. Na feira cabalar e nos concurso de andadura, trotóns e pura raza galega repartiranse 7.000 euros en premios. Ese día tamén terá lugar a actuación estelar das festas deste ano, a cargo de Kepa Junkera. A entrada será de balde. A comisión botou man das mellores orquestras do país, polo que pasarán pola Alameda a Parías de Noia, a Nova Generación, Claxxon, Fania, Filadelfia, Palladium, Marbella, Tekila. O cartel desta edición é obra do artista mindoniense Xosé Vizoso.