A DGT en Galicia inicia unha nova campaña de sensibilización fronte ós atropelos nas vías galegas

A DGT pon en marcha este mes de novembro unha nova edición da campaña de sensibilización fronte a atropelos, co obxectivo de previr e de reducir este tipo de accidentes nas estradas e vías de Galicia. Esta iniciativa, que se vén realizando nos últimos dous anos, céntrase na concienciación de peóns e condutores ante esta forma específica de accidentalidade, que ten unha maior incidencia nos meses do ano con menos horas de luz e peores condicións meteorolóxicas. Para a súa execución, a DGT en Galicia conta coa colaboración da Delegación do Goberno, e o apoio da Xunta e administracións locais.

A programación da campaña da DGT combina accións formativas, que se materializan en charlas efectuadas en diversos concellos, con outras accións de tipo preventivo, entre as que destaca o labor de concienciación por parte dos axentes da agrupación de Tráfico da Garda Civil en vías interurbanas e zonas rurais, tanto a peóns coma a condutores.

As accións formativas desenvolveranse nos concellos galegos polas coordinadoras de educación vial das xefaturas de Tráfico e axentes colaboradores da campaña: gardas civís, membros de protección civil e policías locais. Polo seu lado, as accións preventivas prestarán atención a aquelas infraccións que puidesen cometer peóns e condutores que xeren riscos de atropelo e a aquelas condutas pouco seguras dos peóns, informando estes últimos para que modifiquen os seus hábitos e reduzan os riscos de ser atropelados.

A DGT recorda que, segundo establece a lexislación vixente en materia de Tráfico, son comportamentos sancionables circular sen elemento reflectante, fóra de poboado entre o ocaso e a saída do sol ou con meteoroloxía desfavorable, e atravesar a calzada sen facelo de forma perpendicular ao eixe da calzada ou facelo demorándose, deténdose sen necesidade ou entorpecendo o paso aos demais. Neste sentido, a Agrupación de Tráfico da Garda Civil poñerá especial atención, tanto no comportamento dos peóns coma no dos condutores que convivan con este colectivo tan vulnerable.

200 CHARLAS EN 2013
Na edición da mesma campaña que se desenvolveu en 2013, desenvolvéronse 200 charlas informativas en concellos e repartíronse 20.000 chalecos reflectantes como forma de prevención, tanto nas charlas coma nas estradas.

As estatísticas da DGT coinciden en sinalar os meses de outono e inverno como aqueles con máis risco de atropelos. Así, só o último trimestre de 2013 acumulou o 67% das vítimas por atropelo en Galicia de todo o ano (18 entre xaneiro e decembro, das que 12 se rexistraron nos últimos tres meses). Polo que respecta a este ano, as vítimas por atropelo en Galicia ascenden 12 (1 de xaneiro a 30 de setembro).