González Barcia reuniuse co Director Xeral de Infraestruturas para abordar as obras de acceso ó porto

Burela, 16 de xaneiro de 2015. O alcalde, José Mª González Barcia, mantivo este xoves un encontro en Santiago co director xeral de Infraestruturas da Consellería de Medio Ambiente da Xunta, Francisco Menéndez, para abordar cuestións relativas ás obras de acceso ao porto burelés.

Segundo explica o rexedor: “había dúas cuestións sobre a mesa vinculadas coa realización desa obra. Unha era o asunto do traslado dos inertes que se van retirar cando se fagan os desmontes e outra eran as conversas entre a asistencia técnica da obra e a empresa adxudicataria con Adif Rede de Ancho Métrico, que é a competente da liña de ferrocarril que pasa polo noso concello”.

Para González Barcia “ese punto era o que máis importaba porque hai que cumprir unhas condicións en canto a seguridade, tendo en conta que se vai desprazar a vía do tren con respecto ao trazado actual.
Convén dicirlles aos cidadáns do noso concello que poden estar completamente tranquilos no sentido de que a obra vai para adiante, eu de forma reiterada sempre dixen que desta vez si vai a obra de acceso ao porto e o volvo repetir. E tamén aproveito para informar ao conxunto das veciñas e dos veciños de Burela de que as conversas con Adif van por bo camiño”. O alcalde considera que “hai que ter en conta que Adif é un servizo público de transporte que ten que ter en todo momento a maior seguridade posible para os usuarios desta liña de tren, máxime cando se fan obras e cando se despraza a vía do tren.
Precisamente neste caso é cando hai que extremar as medidas de seguridade. Estes son os detalles que se está a ultimar e concretar neste momento con Adif”. O rexedor subliña que “hai zonas de noiros de 6, 7 ou 8 metros e se quere evitar calquera tipo de sorpresa desagradable que puidera xurdir durante o transcurso da obra ou incluso con posterioridade. Ás condicións de seguridade únense as propias características do chan e da zona onde se fai a obra”.

José Mª González Barcia dixo: “a xente pode estar absolutamente tranquila porque a obra se vai facer. E digo isto porque hai algún comentario pola vila ao mellor por falla de información, aínda que non creo que sexa de mala fe, de que a obra non se vai facer… Disto non hai nada. A obra segue para adiante e o compromiso do presidente da Xunta, Alberto Núñez Feijoo, co acceso ao porto de Burela é claro e manifesto”. O rexedor agarda e confía que “co maior brevidade posible se concreten xa as actuacións a levar a cabo entre Adif Rede de Ancho Métrico, a empresa construtora e a asistencia técnica e que as obras de poidan retomar xa para que discorran de forma ininterrompida, acaben en prazo e así contemos con ese vieiro, polo que levamos agardando tantos anos. É unha infraestrutura necesaria e estratéxica para o porto de Burela e tamén para o conxunto do noso concello”.

Esta mañá o alcalde reuniuse con veciños e coa Comunidade de Montes para explicarlles os termos da xuntanza de onte en Santiago de Compostela.