Cervo, 13 de xuño de 2015.- Alfonso Villares Bermúdez foi proclamado alcalde do Concello de Cervo durante o pleno de constitución da nova corporación conformada en base aos resultados das eleccións do 24 de maio nas que o PP obtiña a maioría absoluta. Villares recibía este sábado á mañá o bastón de mando da man do concelleiro de maior idade da corporación, Plácido Pérez, despois de prometer o seu cargo. Un acto no que ademais todos os edís prometeron ou xuraron o cargo e, en consecuencia, quedou conformada a nova corporación cervense.
Tras a toma de posesión Villares, que é alcalde de Cervo por terceira vez consecutiva, amosouse emocionado xa que “non hai maior grandeza que poder representar ao teu concello e, no meu caso, representar aos meus veciños é o máis grande que podo ter como cervense”.
Ao mesmo tempo, o alcalde fixo balance dos proxectos levados a cabo nos últimos anos e adiantou as liñas nas que traballará o novo equipo de goberno. “Todo o que fixemos nestes anos foi de boa fe, sempre pensando en mellorar a calidade de vida dos veciños e veciñas”, explicou.
En primeiro lugar fixo mención ao esforzo feito para conseguir a estabilidade económica das arcas municipais “sabendo que ese é o camiño para dispoñer de máis cartos para todos os servizos que queremos priorizar”. Tamén nomeou as áreas fundamentais de goberno, como o emprego: “Seguiremos facendo todo o posible para que as cotas de desemprego sexan menores”.
No caso do medio ambiente centrouse no servizo de saneamento “que faremos chegar a todos os núcleos, burgos e aldeas do noso municipio”. E como reto “parello ao medioambiental” referiuse ao turismo. “Non podemos esquecer que Cervo é o corazón da Mariña, non só xeográfico senón tamén cultural, co grande peso da historia de Sargadelos. Polo tanto traballaremos polo turismo apoiados na nosa cultura e na nosa tradición pero tamén apoiados no noso medio ambiente”.
Tamén quixo referirse ás áreas da educación, o deporte ou a cultura, “nas que temos traballado con iniciativas propias pero tamén poñéndonos ao servizo de todas as asociacións e grupos que queren facer algo polo noso concello. Porque nós cremos que o pobo exprésase a través das asociacións, polo tanto elas son as que teñen que promover actividades e nós temos que ser esa administración necesaria e ao servizo dos veciños”.
“Todos somos cervenses”
Da mesma maneira, Villares puxo de manifesto a súa intención de conseguir que goberno e oposición “traballemos xuntos, da man, e tendo sempre a cordialidade que é necesaria en calquera sociedade”. “Todos os que estamos aquí temos algo en común: somos cervenses. E todos nós temos que traballar con unión e co máximo respecto a pesar das nosas diferenzas”. “Eu, pola miña banda, comprométome a seguir respectando a todas as persoas porque é a mellor maneira de traballar e mellorar Cervo”.
O rexedor tamén quixo facer un agradecemento expreso “a todas as persoas que confiaron en nós” e anunciou que “vamos ser o goberno de todos e eu vou ser o alcalde de todos”. Tamén deu as grazas “aos concelleiros electos e aos que non saíron pero formaron parte da nosa candidatura, e aos concelleiros que estiveron con nós estes anos e que fixeron un grande traballo. Sen esquecer aos compañeiros e amigos que sempre dades apoio e alento”.
Para rematar, Villares lembrou que este sábado é o día de San Antonio, e tivo presentes a dúas persoas “ás que sempre levo comigo no corazón: o meu pai Antonio e o meu fillo Antonio” así como outros membros da súa familia. Coas palabras de “viva o concello e viva Cervo” rematou o seu primeiro discurso como alcalde.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
