María Loureiro agradece a todos os veciños e visitantes a súa participación no Mercado Renacentista

Viveiro, 14 de xullo de 2015.- Cando aínda non transcorreron corenta e oito horas dende que rematou o Mercado Renacentista, cómpre facer balance e valorar o desenvolvemento desta celebración que, sen dúbida, se consagrou como un dos referentes festivos do calendario estival. As rúas do casco histórico de Viveiro ameceron o pasado venres engalanadas para a ocasión e, durante os tres días de duración, estiveron ateigadas de xente ambientada de época que participaron no mercado disfrutando dos espectáculos organizados, cos que se pretendeu ampliar e innovar a oferta dos últimos anos; visitando os numerosos postos instalados, nos que adquirir dende artesanía a plantas medicinais, entre outros moitos produtos; e degustando, entre amigos, xantares e ceas nas numerosas mesas habilitadas ao efecto en todo o casco.

Quero, por todo isto, agradecer publicamente a todos os viveirenses e visitantes que coa súa implicación fixeron posible que, esta oitava edición do Mercado Renacentista, fose un éxito absoluto. O número de persoas que participaron no mercado e que visitaron Viveiro nestes días incrementouse con respecto a edicións anteriores, sendo cada vez máis, tamén, o número de persoas que se visten con traxes de época colaborando, deste xeito, na vistosidade da celebración. Na presente edición, ademais, incrementouse de forma notoria o número de persoas que participaron nas comidas e ceas organizadas nas distintas rúas do casco histórico, convertido por uns días nun gran comedor ao aire libre. Segundo os cálculos realizados polo concello, entre as comidas organizadas polos establecementos hostaleiros e as organizadas por particulares, as rúas acolleron a uns 2.000 comensais. Esta cifra vén a demostrar que o que empezou de forma espontánea, como comidas familiares na rúa no ámbito desta festa, se converteu nunha tradición consolidada como referente dos eventos programados para o Mercado Renacentista no que participan, ademais dos propios veciños, moita xente de fóra. Estas comidas na rúa, coas que o concello colabora prestando todas as mesas e cadeiras das que dispón, supoñen un impacto económico notorio no sector hostaleiro que, segundo declaracións propias, viven durante esta celebración un dos mellores fins de semana do ano.

En definitiva, o Mercado Renacentista de Viveiro é un evento consolidado no que destaca a gran participación de veciños e visitantes, importante dende o punto de vista lúdico, económico e turístico; é evidente que o noso Mercado Renacentista medra cada ano, aumentando a súa proxección e repercusión, e isto é posible grazas ao esforzo, traballo e participación de veciños e visitantes. A todos, grazas!