O PP de Viveiro solicita ó goberno local que solucione dunha vez por todas o grave problema da obra do Barrio do Pedregal

Viveiro, 14 de xullo de 2015.- O PP de Viveiro, facéndose eco unha vez máis da demandas dos veciños da rúa Emilio Bouza Basanta, asi como do Barrio do Pedregal da parroquia de Covas sobre a insoportable situación que están a vivir dende hai varios anos, con continuos malos olores, pragas de mosquitos – polo estancamento da auga na devandita obra -, asi como o evidente perigo polo deficiente peche desta, pide que dunha vez por todas se lles de solución a estes veciños.

O PP de Viveiro vén preocupándose polo tema dende hai sete anos e así desmóstrano os tres rogos e dúas preguntas formuladas nos Plenos Municipais ao longo de todo este tempo – pode comprobarse doadamente consultando as actas dos plenos do 25/5/2009, 20/6/2013, 3/4/2014, 2/10/2014 e o ultimo o 5/3/2015 -, xunto coas diversas notas de prensa enviadas aos distintos medios. Ademais das nosas solicitudes de solución, cónstanos que son varios os veciños que se dirixiron ao propio Concello demandando o mesmo, unha solución para unha situación que se volveu insufrible.

O certo é que pasa o tempo e non se fixo nada por poñerlle remedio a este problema, o que demostra unha vez máis o abandono do goberno local socialista que non foi capaz, ata a data, de poñer sobre a mesa nin tan sequera unha solución de mínimos, tal como podería ser o baleirado das augas estancadas e a obriga de que se cumpran unhas estritas medidas de seguridade no relativo ao peche da obra, dado o perigo que entraña sobre todo pola presenza de menores xogando polos arredores.

O PP de Viveiro continuará coas súas peticións e denunciando este tipo de situacións ata que o goberno local socialista dea unha solución a estes veciños. Pensamos que é un problema ambiental, de salubridade e que entraña tantos perigos que xa abonda de escorrer o vulto e tomar cartas no asunto. O goberno socialista debe asumir as súas responsabilidades e poñer os medios que estean ao seu alcance para dar unha resposta rápida e satisfactoria a este vello problema que tanto tempo levan soportando estes sufridos veciños desta zona.