O prazo para presentar candidaturas para o Pleno da Cámara de Lugo ábrese este xoves

Lugo, 16 de setembro de 2015.- Mañá ábrese o prazo para presentar candidaturas para a Cámara Oficial de Comercio, Industria e Navegación de Lugo, segundo a resolución da Dirección Xeral de Comercio que publica este mércores o Diario Oficial de Galicia mediante a cal se convocan as eleccións para a renovación do pleno do ente.

Tal e como se indica nesta publicación, tanto as candidaturas elixibles por sufraxio do electorado como as listas das candidaturas correspondentes aos representantes das organizacións empresariais máis representativas deberán presentarse durante os próximos 15 días, desde mañá e ata o vindeiro 3 de outubro incluído.

O pleno da Cámara estará composto por 24 membros, dos cales 21 serán elixidos polo electorado, mentres que as organizacións empresariais propoñerán 3 representantes. A elección dos vogais elixibles por sufraxio do electorado terá lugar o vindeiro 10 de novembro, data na que o colexio electoral permanecerá aberto entre as 09.00 e as 21.00 horas. Os electores que prevexan que na data das eleccións non poidan comparecer nos colexios electorais poderán exercer o seu dereito ao voto emitíndoo por correo. Posteriormente, os membros electos do pleno escollerán aos vogais propostos polas organizacións empresariais, o 17 de decembro, entre as 13.00 e as 14.00 horas.