Visita á depuradora de Malpica dos concelleiros de Obras e Servizos e Medio Ambiente de Burela para coñecer o funcionamento dunha EDAR compacta

Burela, 30 de outubro de 2015.- Os concelleiros de Obras e Servizos e Medio Ambiente, Ramiro Fernández e Noelia Mª Ben, acompañados polo arquitecto municipal visitaron este xoves a estación depuradora de Malpica da man de Augas de Galicia. Alí coñeceron o funcionamento dunha EDAR compacta similar á que terá Burela.

O edil socialista contou que “fomos facer a visita que tíñamos comprometida con Augas de Galicia á depuradora de Malpica, que é parecida á que se ten previsto facer aquí,aínda que para menos poboación (7.000 persoas), en Burela. Foi unha visita moi didáctica, moi ilustrativa de cómo vai ser o futuro proxecto da EDAR de Burela. Explicáronnos perfectamente os detalles técnicos da instalación e os proles e os contras que teñen este tipo de depuradoras compactas con respecto ás convencionais”.

Ramiro Fernández Rey dixo que “nosoutros temos unha necesidade, que é mellorar a depuración de augas pois agora mesmo non estamos cumprindo ao cen por cen coas esixencias da Unión Europea, co cal temos que facer algo. Augas de Galicia é moi consciente do problema que temos en Burela e así nolo transmiten. Pero temos o problema dos metros cadrados que fan falla para esa instalación, xa que Portos denegou a petición feita desde o Concello para utilizar a explanada do porto e o único que nos admiten é cedernos terreos para a ampliación da depuradora que temos, co problema que isto supón en canto a custes. Iso, segundo explicaron os técnicos, evidentemente é un contratempo, porque estas instalacións necesitan espazo que no caso de Burela roldarían os 4.000 metros cadrados, cando deste xeito os técnicos din que se roldarían os 2.500 metros cadrados”.

O concelleiro de Obras e Servizos engadiu que “a de Malpica é unha depuradora compacta, que lle chaman así porque ocupa moito menos solo que unha depuradora convencional. E iso é, máis ou menos, o que se ten pensado facer aquí, en Burela. Entón van ter que aproveitar ao máximo o terreo dispoñible para facer unha depuradora compacta. O problema destas depuradoras é que son moito máis caras que as convencionais e que a xestión das mesmas tamén se encarece un pouquiño ao ter que usar moitos máis produtos químicos para facer o tratamento das augas”.

Ramiro Fernández sinalou que “isto é que o nos explicaron onte en Augas de Galicia, que están empezando a traballar no proxecto e segundo vaiamos avanzando no estudo do mesmo iremos analizando a situación e dende logo traballaremos para que as solucións que se dean por parte de Augas de Galicia sexan as máis beneficiosas para o conxunto dos veciños e veciñas de Burela”.