Augas de Galicia executa unha actuación de mellora e mantemento en dous quilómetros do río Xunco, en Cervo

Santiago, 31 de outubro de 2015.- A Consellería de Medio Ambiente e Ordenación do Territorio e Infraestruturas está a executar unha actuación de conservación no río Xunco, ao seu paso polo Concello de Cervo. Esta tarefa que realiza Augas de Galicia ten por obxectivo evitar os asolagamentos nas etapas de choivas abundantes e intensas, xa que o depósito de material nos leitos dos ríos provoca embotamentos.

Neste caso concreto, estase a actuar nun tramo de 2.200 metros á altura do lugar de San Román, na parroquia de Sargadelos; e os traballos que se realizan consisten na retirada de troncos de árbores e polas caídas sobre a canle, incluíndo elementos de madeira morta existente na mesma. Todos estes labores teñen un custo aproximado de 3.700 euros.

Cabe recordar que os traballos de roza están recollidos dentro do programa de mantemento, conservación e mellora do dominio público das bacías de Galicia-Costa e as súas zonas de acceso e protección que a Xunta de Galicia promove.

Pulo ás actuacións de conservación e limpeza
O Goberno galego conta cun Regulamento da planificación en materia de augas de Galicia, que inclúe as medidas necesarias para axilizar a limpeza dos ríos. Así, con esta normativa só é necesario que o particular ou administración local correspondente comunique con 15 días de antelación as tarefas a executar a Augas de Galicia. Trátase dunha axilización fronte aos outros trámites, que se traducen nunha duración de entre 4 e 6 meses por expediente.