Olalla Rodil mantivo en Burela un encontro con Emigrantes Retornados da Mariña

A Mariña, 15 de decembro de 2015.- A candidata ao congreso Olalla Rodil mantivo unha reunión cun grupo de persoas do colectivo de Emigrantes Retornados na Mariña que levan case tres anos loitando por un trato xusto por parte da facenda española. A candidata acompañada doutras persoas que fan parte da coalición Nós – Candidatura Galega deu o seu apoio ao colectivo como o levan facendo desde fai anos a xente do BNG aquí, nos concellos, na Deputación, no Parlamento Galego, no Congreso e no Parlamento Europeo.

Olalla Rodil reafirmou o compromiso de Nós – Candidatura Galega cos emigrantes retornados, “conseguir un trato xusto, que se elimine a retroactividade da tributación das pensións do estranxeiro, que se acaten os Convenios Bilaterais e se acepten as pensións de invalidez implica modificar o sistema tributario e fiscal para poñelo ao servizo das persoas e de Galiza, e non dos lobbies financeiros”.

Non temos dúbida, afirmou, “que as persoas estafadas pola axencia tributaria en ningún caso tiñan ánimo de defraudar, ao contrario, son vítimas do ánimo recadatorio da facenda española que non ten alma nin consideración coas capas mais débiles da sociedade e actúa como cómplice dos auténticos evasores fiscais poñendo ao seu servizo ferramentas evasorascomo as SICAVs ou a amnistía fiscal que premiou en 2013 aos Barcenas de turno”, precisou Olalla Rodil.

Reformas no sistema público de pensións e seguranza social
As sucesivas reformas regresivas sobre as pensións e a seguranza social reduciron e empeoraron o acceso ás pensións contributivas, atrasando a idade efectiva da xubilación, rebaixándoa aos que acceden ao sistema, conxelándoa e incrementándoa por baixo do IPC, actuando con maior virulencia na Galiza por termos as pensións máis baixas de todo o Estado español e a poboación máis avellentada.

Nós – Candidatura Galega aposta por traspasar a Galiza a competencia da xestión do réxime económico da Seguranza Social previsto no Estatuto de Autonomía. Aplicar o superávit da Seguridade Social á dotación do Fondo de Reserva e á mellora da acción protectora do sistema. Derrogar as reformas das pensións. Mellorar as pensións do nivel contributivo e non contributivo da Seguranza Social e do réxime especial, revogando as reformas de extensión da idade de xubilación e o período de cálculo da pensión. Lograr o dereito a unha pensión mínima igual ao salario mínimo interprofesional. Revalorizar as pensións, como mínimo cada ano, igual ao IPC. Estabelecer a xubilación ordinaria aos 65 anos e voluntaria con 35 anos cotizados. Eliminar as discriminacións ou penalizacións existentes nas condicións legais de acceso á pensión daquelas persoas empregadas a tempo parcial. Conseguir pensións dignas (como mínimo iguais ao SMI) para as persoas con diversidade funcional imposibilitadas para traballar. Recoñecer un salario de inserción laboral para todas as persoas que non cobraren ningún tipo de prestación económica.