Os socialistas acusan ao PP de “facerse trampas ao solitario” para “beneficiar a uns poucos e perxudicar á maioría” no reparto de cotas de pesca

Santiago de Compostela, 16 de decembro de 2015.- O portavoz de Pesca do Grupo Socialista, José Ramón Val, acusou este mércores ao PP de “facerse trampas ao solitario” ao fixar uns criterios de reparto de cota de pesca que “beneficia a uns poucos e prexudica á maioría”. Así o dixo no debate dunha pregunta oral na Comisión de Pesca do Parlamento sobre un reparto que mantén ao 80 por cento da flota amarrada a porto.

Val sinalou que “o problema está na aplicación do reparto individual” das cotas e na decisión de determinar que os dereitos históricos teñan un peso do 70 por cento sobre os repartos, o que vai contra da inmensa maioría dos buques galegos. Esixiu un modelo que garanta “o maior traballo posible a todos e cada un dos barcos do cerco, non que traballe un e o resto estean parados”.

Esixiulle ao PP e ao goberno galego que “asuman que o seu modelo non é viable ou non fai viable manter a actividade á gran maioría da flota de cerco” e que se manteñen acampados fronte a San Caetano. Lembrou que antes de que o PP tomara a “decisión política” de modificar os criterios, o traballo era rendible “todo o ano” para a flota de cerco.

Desafiou á Xunta a “dicir abertamente que o seu obxectivo é que queren reducir o número de barcos de cerco que faenan dende os portos galegos”. Advertiu que os armadores continúan “tremendamente preocupados” por esta situación, malia un descenso da tensión debido a que “hoxe están faenando en alta mar”.