Os Premios Camiño de Santiago distinguen as mellores iniciativas destinadas a conservar e mellorar as rutas xacobeas

Santiago, 16 de decembro de 2015.- Os galardóns da I Edición dos Premios Camiño de Santiago, promovidos por Turismo de Galicia, foron entregados na mañá deste mércores nun acto celebrado na Cidade da Cultura que contou coa participación do conselleiro de Cultura, Educación e Ordenación Universitaria, Román Rodríguez, a directora de Turismo de Galicia, Nava Castro, a delegada territorial da Xunta en Lugo, Raquel Arias, e o xerente de Xacobeo, Rafael Sánchez, entre outras autoridades.

Estes premios constitúen un recoñecemento institucional e social ás iniciativas públicas e privadas destinadas a conservar, mellorar e embelecer a contorna das distintas rutas do Camiño de Santiago, aquelas que impulsan novos servizos ou a innovación e mellora daqueles que se prestan aos peregrinos así como as accións específicas de divulgación e promoción do Camiño de Santiago e da cultura xacobea.

Os principais obxectivos destes premios son avanzar na mellora de cada un dos itinerarios do Camiño de Santiago así como, no seu contorno ambiental, paisaxístico e arquitectónico e a súa protección xeral e posta en valor.

Así mesmo, Turismo de Galicia pretende aumentar con eles a sensibilidade cidadá coa relevancia dos valores do Camiño de Santiago e estimular o coñecemento do patrimonio xeral do Camiño fomentando a colaboración cidadá en coordinación coas Administracións públicas.

Durante o acto, a directora de Turismo de Galicia destacou o espectacular crecemento do número de peregrinos, que no que vai de ano superaron xa os 260 mil, e o impulso acadado polo fenómeno xacobeo que supera xa o ámbito nacional.

Así mesmo, Nava Castro referiuse aos recoñecementos internacionais dos que goza O Camiño destacando, entre outros, a declaración de Primeiro Itinerario Cultural Europeo polo Consello de Europa, o recoñecemento como embaixador da Marca España ou a recente declaración de Patrimonio da Humanidade pola UNESCO aos Camiños do Norte.

Con todo, a responsable de Turismo da Xunta afirmou que a Ruta Xacobea converteuse nun itinerario de referencia a nivel mundial que constitúe a carta de presentación a nivel internacional de Galicia e un potente elemento diferenciador da nosa comunidade como destino.

Pola súa parte, o conselleiro de Cultura, Educación e Ordenación Universitaria, Román Rodríguez, tamén subliñou a relevancia universal do fenómeno xacobeo e a importancia que os Camiños teñen para o desenvolvemento de Galicia. Segundo dixo, con estes galardóns estase recoñecendo o talento e a excelencia en prol da conservación, a difusión e a posta en valor do Camiño de Santiago.

Román Rodríguez aproveitou o acto de entrega destes premios para poñer en valor o papel das asociacións “que contribúen dun xeito fundamental á permanencia dun fenómeno onde o factor humano resulta insubstituíble”, e o traballo empresarial “que incide directamente na creación de valor e emprego”.

O conselleiro tamén asegurou que con estes galardóns se recoñece a investigación patrimonial e a aposta pola educación dos máis cativos, xa que con formación, sensibilización e investigación contribuímos a que “o noso patrimonio teña, ademais de presente, futuro”.

Premiados
Na primeira categoría, destinada a distinguir as iniciativas dos concellos polos que discorren as diversas rutas do Camiño de Santiago, recaeu o primeiro premio no concello de Ordes, polo seu coidado nas labores de roce e limpeza do Camiño, primando o realizado na ruta do Camiño Inglés; e o segundo, no concello de Portomarín, pola organización do Camiño a través de medidas como a peonalización do casco histórico para facilitar a estadía dos peregrinos, a instalación de moblaxe urbana, o deseño de planos de rúas e códigos QR, a posta en valor de bens patrimoniais e outras medidas de divulgación do Camiño.

O primeiro premio da segunda categoría, destinada a distinguir as actuacións desenvolvidas polas Asociacións de Amigos do Camiño de Santiago, recoñeceu o traballo da Asociación de Amigos del Camino de Santiago de Ávila polo seu impulso continuado do Camiño e as numerosas actividades en torno a él, como a sinalización de rutas alternativas ás estradas, o apoio na limpeza, a xestión de albergues así como a edición de publicacións divulgativas da Ruta Xacobea. O segundo premio recaeu na Asociación Gaditana Jacobea – Vía Augusta polo seu impulso do Camiño a través da realización de numerosas actividades e a súa protección nas terras onde se localiza a asociación.

Na terceira categoría, destinada a distinguir as iniciativas ou as actividades desenvolvidas por as pequenas e medianas empresas, o primeiro premio foi para a Asociación de Desenvolvemento Rural Mariñas- Betanzos en recoñecemento ao proxecto de mellora do Camiño Inglés levado a cabo na Reserva da Biosfera Mariñas Coruñesas e Terras de Mandeo. O segundo premio desta categoría recibiuno María Varela Mosquera, da empresa de turismo rural A Parada das Bestas pola rehabilitación do inmoble con criterios de bioconstrución e respecto polo contorno, a recuperación de receitas de peregrinos medievais a través da investigación, e a participación en actividades relacionadas coa gastronomía no Camiño de Santiago.

Por último, a cuarta categoría premiou ao Grupo de Investigación Cultural e Sociedades no Mundo Ibérico desde a Idade Media, do Instituto de Estudos Galegos Padre Sarmiento, ao Colexio de Educación Infantil e Primaria Belesar, de Baiona; e ao IES Plurilingüe San Rosendo, de Mondoñedo, polo seu labor académico, educativo e de investigación.