O alcalde de Burela asegura que en seis meses de goberno socialista se fixeron máis cousas que nos catro anos anteriores de xestión do PP

Burela, 16 de decembro de 2015. O alcalde, Alfredo Llano, asegurou que o principal obxectivo do seu goberno é traballar no interese dos veciños do municipio e que nos seis meses que leva á fronte da administración local se fixeron máis cousas que nos catro anos anteriores de xestión do PP. Ademais, Llano anunciou que os orzamentos para 2016 se presentarán ao pleno ordinario de xaneiro.

Sobre as críticas realizadas nas últimas horas desde o PP o rexedor burelés dixo: “hai que ser pouco consciente do que se di cando se está criticando a nosa data dos orzamentos, que por certo, aproveito para dicir que nos mes de xaneiro imos levalos ao pleno ordinario. Podiamos facer un pleno extraordinario en decembro ou en xaneiro, pero vaise facer no ordinario de xaneiro. Estamos traballando neles e espero que sexan uns orzamentos que beneficien ao conxunto dos veciños de Burela. Hai que ter moi pouca responsabilidade cando se nos está culpando de que non fixemos os orzamentos, cando eles o ano pasado os presentaron case no verán. Coherencia, cero. Que non se fixo nada no Concello? Fíxose máis nos seis meses que levamos no goberno de Burela que fixeron no seu conxunto nos catro anos anteriores. Estamos traballando e procurando facer unha labor axeitada, acorde coas necesidades de Burela, tratando de actuar en moitas frontes ao mesmo tempo”.

Alfredo Llano asegurou que “non hai máis que dar unha volta polo pobo para ver que é o que se está facendo ou non. E non soamente iso, tamén na maneira de xestión estamos procurando dentro das nosas posibilidades facelo o mellor posible. Evidentemente é o noso obxectivo, traballar para todos os veciños de Burela e facer un pobo atractivo no social, no económico e no cultural, como en todo aquilo que mereza a pena para o noso pobo, hai que traballar e evidentemente é o que estamos facendo. Non lle dou máis voltas ao asunto. É unha pena que faga eses comentarios o señor Barcia, que diga que aquí cero patatero, cando o cero patatero xa se verá de onde procede, xa se verá quen o fixo durante catro anos. É unha pena que fagan estas manifestacións, por dicir algo para poñer un pouco ao día as críticas ao equipo de goberno, soamente por iso”.