O Concello de Cervo está repartindo entre todas as familias do municipio calendarios de 2016, nos que se reproducen imaxes da década dos 80 de todas as parroquias

Cervo, 30 de decembro de 2015.- O Concello de Cervo está a distribuír estes días calendarios de 2016 entre todas as familias do municipio para que os veciños teñan información precisa das citas importantes do ano. Nesta ocasión ilustran o almanaque imaxes de parroquias e veciños de Cervo nos anos oitenta do século pasado.

O alcalde de Cervo, Alfonso Villares, anunciou este mércores “que como vén sendo habitual, dende o Concello de Cervo estamos repartindo calendarios en todas as casas e unidades familiares do Concello de Cervo, todas as que temos no noso censo. Con eles queremos dar información precisa aos veciños daqueles eventos, citas e actividades xa programadas, ben organizadas polo Concello ou por outra asociación en colaboración co Concello. Neste calendario reproducimos imaxes de familias e veciños referentes ao noso pasado e este ano as fotografías son dos anos 80. Intentamos que aparezan representados veciños de todas as parroquias do Concello de Cervo”.

Villares asegura dende o Concello “consideramos importante recordar o noso pasado e darlle información precisa aos nosos veciños, así como tamén felicitarlles o ano, que as cousas nos saian ben e os desexos que poidamos ter se cumpran na maior das medidas”.

O rexedor rematou explicando que “aquelas familias ás que por calquera motivo non lles chegue o calendario poden achegarse ao Concello de Cervo e tamén se lles dará, se non o recibiron pola vía na que o estamos a repartir. Estase facendo en función do censo que temos no noso Concello e o reparto vai rematar antes do final deste ano”.