Os Melidaos presentan “Festa na Codeseira” en Burela

O vindeiro sábado, 9 de abril, ás 18.00 horas, no Auditorio da Casa da Cultura de Burela, dentro da Programación Cultural do 2ª Semestre, a Delegación Municipal de Cultura preséntanos ao Grupo de Música Tradicional OS MELIDAOS co seu último disco “FESTA NA CODESEIRA”. A entrada será libre.

O Grupo de música tradicional Os Melidaos naceo no ano 2000 en Melide pola unión de músicos de diferentes xeracións e variada procedencia que consideran que a música tradicional é un tesouro que compre conservar. Este grupo vén desenvolvendo a súa actividade musical, dende hai quince anos, con aquel principio como guía.

Os membros do grupo Melidaos son:

-Pepiño Blanco-Bombo.
-X.Luís Casal-Tamboril.
-Antonio Raposo-Gaita, pínfano e pandeireta.
-Diego González-Gaita e pandeireta.
-Xele Barrio-Acordeón.
-Carlos Barbeito.-Gaita.
-Pilar Ramallal- Gaita e Pandeireta.

O seu repertorio nútrese de pezas do cancioneiro tradicional, dos arquivos dos catro Coros Historicos , de diferentes cuartetos ou agrupacións relevantes do noso país, cancións recollidas por eles mesmos ; así como outras pezas da súa creación.

A súa discografía, conta xa con tres discos no mercado:

-“Que ben baila, que ben baila” 2009.
-“Axudáme a cantar” 2012, no que incluiron por vez primeira, as voces dos seus membros.
-“Festa na Codeseira” 2015 , con máis da metade das pezas tamén cantadas. O disco contén 15 pezas con importante presenza da voz e con máis da metade das mesmas compostas por Antonio Raposo Vidal. Un disco con pasodobres, muiñeiras, valses , foliadas, pasacorredoiras e, por suposto, alalás, pezas imprescindibles no nosa tradición musical polas que Os Melidaos senten auténtica devoción.

O grupo leva anos investigando, conservando, poñendo en valor e divulgando a enorme riqueza musical deste País. Un grupo que goza coa nosa música, que busca a información de cada unha das pezas que interpreta, que respecta coa máxima fidelidade as cancións que chegan ata eles e que , por enriba de todo, amosan orgullo interpretando a música galega.

Nos últimos anos pasaron por importantes escenarios: Teatro Rosalía de Castro da Coruña, Salón Teatro de Compostela, Museo Provincial de Lugo, Auditorio de Pontevedra, Rianxo, Baiona, Vigo, Redondela, Casa de Rosalía de Castro en Padrón, na Praza Maior de Ourense, tocando e cantando coa Coral de Ruada ou no centenario do Real Coro Toxos e Froles de Ferrol, entre outros.

Os Melidaos incorporaron hai meses á súa formación unha muller, Pilar Ramallal Fernández, gaiteira da Mariña Lucense, de Burela e, hai unhas semanas a un novo gaiteiro, Carlos Barbeito, de Oleiros, que vén a substituir ó veterano Marcelino Vázquez que decidiu deixar a formación pola súa elevada idade. Seguen sendo, pola tanto, sete membros.