O PSOE de Ribadeo denuncia o veto de dúas das tres mocións que presentaron no último pleno

Ribadeo, 7 de xuño de 2016.- O Sr. Alcalde de Ribadeo veta dúas das tres mocións levadas ó pasado Pleno polo grupo municipal socialista.

Parece que Fernando Suárez non está disposto a permitir a participación cidadá na política municipal. Así o demostra o feito de que o regulamento de participación veciñal no que, ó parecer, traballaba o partido nacionalista nas pasadas lexislaturas non teña visto a luz ata o de agora, corroborado polo feito de que non quixera levar ó Pleno do pasado día 30, a moción presentada polo grupo socialista, na que se incluía unha proposta de regulamento para que a voz dos e das ribadenses tivese espazo real e regulado no Concello.

Asemade, tampouco levou ó Pleno una moción relativa á mais que necesaria reordenación do tráfico na vila. O señor alcalde está contento dabondo con ter posto un par de pasos elevados que protexen a súa casa e mais ós seus do risco e do ruído do tráfico. Mais alá deso, nada lle preocupan os riscos, incomodidades e ruídos que sofren o resto dos veciños e visitantes, nin a falta de aparcamento ou a escasa iluminación das vías incluso en puntos especialmente perigosos.

É o que algúns entenden por gobernar ca comodidade da maioría absoluta. Nada de que preocuparse ata que se acheguen as próximas eleccións. Nada excepto tratar de debilitar a imaxe dos seus contrincantes de cara ás mesmas, modificando as datas dos plenos (que están previstos para o segundo xoves de cada dous meses) de xeito que algún dos concelleiros non poida estar (parecen esquecer que os da dedicación exclusiva son eles e que os demais teñen que traballar para gañarse a vida) ou remitir a amplísima documentación para preparalos con moi pouco tempo de antelación, tratando de impedir así que os concelleiros e concelleiras dos partidos da oposición non poidan preparar ben os Plenos. Tan sobrados van que nin se molestan en debater as propostas do resto dos grupos municipais que, non debemos esquecelo, son tamén, e tan legalmente coma eles, representantes dos veciños e veciñas de Ribadeo.

Sr. Alcalde, Sres. e Sras. Concelleiras do BNG, o movemento demostrase andando, e a vontade de escoitar, escoitando e respectando. Se queren que os veciños e as veciñas de Ribadeo se crean as súas manifestacións, leven ós Plenos todas as mocións dos outros partidos, sen censuras; regulen a participación cidadá, como xa se ten feito en moitos outros concellos de toda España; cambien a data dos Plenos se hai causa que o xustifique, pero co consenso de todos e todas as concelleiras e co compromiso de buscar unha data na que todos e todas poidan estar presentes; acheguen a documentación dos asuntos a tratar con tempo suficiente para que quen ten outras obrigas poida examinala e preparar as súas intervencións.

E traballen, que vai un ano de lexislatura e non temos visto ningunha actuación de calado no noso concello. Non garden os cartiños para os meses anteriores ós seguintes comicios municipais porque, mentres tanto, as rúas e beirarrúas da vila dan noxo. As estradas das aldeas están intransitables por múltiples furados de tamaños sorprendentes. As cunetas emperradas. As pistas de concentración parcelaria desfeitas. Segue sen haber onde aparcar. Están a verterse augas fecais á Ría; etc., etc., etc.