Burela, 11 de xuño de 2016.- O CD Burela FS Pescados Rubén está máis preto doutro soño. A escuadra de Iván Cao, Lucas, pelexará mañá polo triplete da tempada, na final XXII Copa de España de Alcorcón, tras impoñerse ao anfitrión por 5-1 en semifinais. Este domingo, ás 12.00 horas, as laranxas regresarán a Los Cantos para baterse co seu arquinimigo, o Atlético de Madrid Navalcarnero, que conseguiu o billete para a gran cita fronte ao UA Alacante, con resultado idéntico ao das galegas.
Saltaron ambos os equipos apostando pola intensidade. O conxunto anfitrión conseguiu adiantarse no marcador antes de cumprirse o segundo minuto de xogo, cunha recuperación no medio do campo fronte a Gaby no chan. As mariñás conseguiron frear o perigo con nome propio, de Anita Luján, que intentou sorprender a Jozi cunha vaselina no minuto 6, e non cesaron no empeño de perforar a meta da sólida Belén de Uña; Gaby puxo as táboas no minuto 8, cun zurdazo, en media volta. A falta de 5 minutos para o descanso, tras dous balóns envelenadísimos de Anita, intentouno Gaby por arriba, sen éxito; con todo, quen non perdoou foi Peque, que roubou á protagonista goleadora de Alcorcón e apoiouse en Bea Mateos para asinar o 2-1. Volveu a defensa a facer os deberes para manter a renda nos seguintes compases, con Jozi perfecta ante un lanzamento afastado de Vadillos que buscaba sorprender á brasileira e con Maite e Dany que salvaron ao bordo da liña de meta un balón de Anita Luján. Foi entón cando o Pescados Rubén deu un golpe sobre a mesa, de novo con Gaby, que recolleu fronte á meta de Alcorcón o pase de Dany desde a banda tras arrebatarlla á omnipresente Anita.
Regresou o Burela FS á pista sen respiro no ataque. Así, xa o 21, Dany volveu facer estalar a alegría na bancada laranxa co 4-1 en escapada pola banda. A punto estivo de ampliar a fenda Peque, no 26, a pase de Gaby, superada xa Belén, e pouco despois Ceci, desbaratada a tentativa pola meta anfitrioa. Chegaron despois as mellores oportunidades do Alcorcón, con correcta resolución de Jozi no 28 ante Vadillos, e co largueiro como obstáculo ate Desirée, no 30. A falta de pouco máis de oito minutos para o final, as de amarelo apostaron por xogo de cinco coa ex-burelista Ro como líder. Mantívose o Pescaos Rubén impertérrito a reacción do Alcorcón ata que chegou a oportunidade do quinto, da sentenza, como hattrick de Gaby, a falta de dous minutos.
Teledeporte emitirá en diferido a cita polo título mañá a partir das 14.30 horas, segundo a programación da canle de RTVE.
Ficha técnica
CD Burela FS Pescados Rubén: Jozi, Dany, Peque, Gaby, Bea Mateos, cinco inicial; tamén xogaron Claudia, Maite, Ceci
ADA Alcorcón FSF: Belén, Vadillos, Isa García, Desirée, Anita Luján, cinco inicial; tamén xogaron Natalia Flores, Pitu, Natalia Orive, Cris Llanos, Ro, Aída
Goles: 0-1, minuto 1, Anita Luján; 1-1, minuto 8, Gaby; 2-1, minuto 15, Peque; 3-1, minuto 17, Gaby; 4-1, minuto 21, Dany; 5-1, minuto 37, Gaby
Árbitros: Cristian Gómez García e Jorge Moreno Durán, do colexio madrileño. Por Alcorcón, amarela para Natalia Flores (minuto 12), Ro (minuto 33).
Incidencias: Partido correspondente a semifinais da XXII Copa de España de Alcorcón disputado no pavillón Los Cantos de Alcorcón, con emisión en directo de Teledeporte.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continúa con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
Finalizado o encontro, de carácter privado, o Cónsul asinou no Libro de Ouro da Deputación e a Presidenta fíxolle entrega dun agasallo institucional. Trala xuntanza Carmela López manifestou a súa satisfacción porque “traballamos para avanzar en novas vías de colaboración, e en posibles proxectos que serven para reforzar a relación entre a Deputación e o veciño país de Portugal”.
