Discriminación económica das persoas convocadas para as mesas electorais

C. Fernández.- Son unha galega abraiada ao ler nos xornais: “A XUNTA COMUNICA AOS CONCELLOS QUE SE FARÁ CARGO DO CUSTE DE LEVAR OS VECIÑOS A VOTAR NAS ELECCIÓNS AO PARLAMENTO DE GALICIA.” Esta mesma galega é mai dun rapaz que “por sorteo” lle tocou acudir no día 25 de setembro de 2016 ao seu colexio electoral como membro de mesa con cargo de 2º suplente de 2º vogal. Este rapaz está estudando nunha cidade galega de diferente provincia, ben lonxe da vila onde ten o seu domicilio e esa presenza obrigatoria (baixo pena de prisión ou de pago de multa) ocasiónanos un gasto extra de 40,45 € (billete de autobús ida e volta) para a precaria situación económica da unidade familiar monoparental.

Toda esta situación relatámola nun escrito de alegación presentado perante a Xunta Electoral de Zona e esta resolveu: “non escusalo da obriga de formar parte da mesa electoral por non estar o alegado entre os supostos de escusa (reflexados na instrucción 6/2011 da JEC)”.

Á vista do exposto, eu quero facer publicamente unha serie de preguntas á Xunta de Galicia:

Por que a Xunta de Galicia pon transporte de balde para levar o electorado aos colexios no día 25 de setembro e non paga o importe do billete de autobús ao electorado que a propia Administración obriga a presentarse como membro suplente? Por que esa desigualdade, esa diferenza de trato?

Por que a Xunta pon transporte de balde para ir votar e non se lembra dese mesmo electorado facilitando un transporte público un día á semana para acudir ás vilas facer xestións habituais (consultas médicas programadas non urxentes, farmacia, xestións municipais, etc..?).

Por que a Xunta pon transporte de balde para ir votar e nega o pagamento do transporte cando unha persoa ten que desprazarse por razón de saúde desde o hospital da sua área sanitaria a un hospital de referencia dentro da mesma provincia?

Por que a clase política cando se despraza para “cumprir co seu deber” como representante da cidadanía ten o transporte gratuito ou lle pagan os gastos -mesmo en avión, e non precisamente en clase turista- e á cidadanía que a Administración Electoral obriga a acudir como suplente para ”cumprir con este deber” (segundo reflicte o manual de instruccións para os membros das mesas electorais) non lle reintegran o importe do transporte, aínda que este gasto imprevisto lle ocasione un trastorno para a sua precaria economía?

Pido ás persoas que se dedican á política que reflexionen sobre esta inxustiza, sobre esta discriminación relacionada co proceso electoral. Confío en que a democracia vaia medrando, se vaia enriquecendo en tratos de igualdade cara á cidadanía. Con atropelos como este, a democracia, no canto de medrar, reve.

C. Fernández