Santiago, 29 setembro 2016. Dez eurodeputadas e eurodeputados de diferentes países da Unión Europea, entre eles a galega Lídia Senra, veñen que rexistrar unha declaración por escrito de conformidade co artigo 136 do Regulamento do Parlamento Europeo, a favor dunha regulación pública da produción leiteira. Agora, ábrese un prazo de tres meses, e as e os impulsores teñen até o 12 de decembro para obter o apoio de polo menos a metade máis un das eurodeputadas e eurodeputados da Cámara. De lograr esas 376 sinaturas mínimas necesarias, a declaración sería aprobada automaticamente.
O texto está promovido ademais de por Lídia Senra, eurodeputada de Alternativa Galega de Esquerda en Europa (AGEe), integrada no Grupo Confederación da Esquerda Unitaria Europea/Esquerda Verde Nórdica (GUE/NGL), por Miguel Viegas, João Ferreira, Ángela Vallina, Fabio de Masi, João Pimenta Lopes, Neoklis Sylikiotis e Takis Hadjigeorgiou (todos e todas elas tamén do GUE/NGL) e por José Bové, do Grupo dos Verdes/ALE; e Marc Tarabella, de S&D.
A declaración fai fincapé en que nos últimos anos, decenas de miles de produtoras e produtores de leite en toda a UE foron obrigadas e obrigados a abandonar a produción e asegura que a situación crítica en que o sector lácteo se encontra débese á súa liberalización, tachando de “totalmente inaxeitadas” as solucións presentadas até a data. En efecto, e no tocando a Galiza, esta semana semana coñecíase o dato de que só o 9% das gandeiras e gandeiros galegos pediron a subvención da UE para reducir a produción de leite. Para Lídia Senra, este dato corrobora que a solución non pasa por subvencionar o peche de explotacións leiteiras, como se pretende desde as institucións públicas, senón por levar adiante políticas que permitan manter un rural vivo e un sistema de produción local, con prezos dignos e mercados de proximidade.
As persoas impulsoras da declaración escrita defenden que hai unha “necesidade urxente” de adoptar medidas para axustar a oferta á demanda, así como un mecanismo para asignar dereitos de produción con vistas a resolver a actual discriminación. Chaman tamén a “contrarrestar de forma inmediata o dumping entre os Estados membros” e reclámanlle á CE que estude “a necesidade de introducir instrumentos públicos de regulación da produción e dos mercados que asegure prezos xustos para as produtoras e produtores”, tendo en conta tanto o custo dos insumos como os prezos ao consumo, “co fin de garantir unha distribución equitativa do valor engadido ao longo da cadea de valor do sector e evitar a concentración e intensificación da produción, respectando o dereito a producir de cada Estado membro”.
Segundo datos da Consellería de Medio Rural da Xunta de Galiza, nos primeiros cinco meses do 2016, pecharon un total de 222 gandeirías de vacún de leite no noso país, cifra que se suma á crise continua que o sector ven padecendo nos últimos anos.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
