Na tirada de bolos de Vilachá do campionato de Xove participaron 36 persoas

XOVE .-Tarde escura e chuviosa. Campo en boas condicións, máis rápido do normal debido á auga caída durante o día. Participaron 36 inscritos: 23 na Liga Senior, 5 na Sub 18 e 8 na Liga Feminina. Excelente participación, sobre todo na Liga Feminina.

Liga Senior.- Primeira victoria de Arturo Vigo este ano. Ginés Rodríguez continúa líder, ampliando a súa vantaxe sobre César Cancelos e José Rafael González. Ata aquí todo normal. Pero temos que destacar dous feitos, pouco menos que extraordinarios:

O primeiro, que MODESTO ALBO VIDAL, 80 anos , quedou segundo con 165 tantos, por detrais só de Arturo Vigo, na tirada deste fin de semana; toda unha fazaña para unha persoa que, a súa idade, vive e goza deste deporte como se fose un rapaz. Noraboa! e que siga gozando moitos anos.

O segundo, que a mellor bolada na categoría senior a conseguiu unha muller con 69 tantos, concretamente CARMEN ROCA CORRAL, quen gañou a mellor bolada despois de desempatar con Arturo Vigo, que tamén conseguira 69 tantos. A verdade é que non temos verbas para describir a impresionante bolada realizada por Carmen. Un aviso de que as mulleres comezan a petar forte neste deporte. Noraboa! tamén para Carmen.

Liga Sub 18.- A victoria de Cristian Rodríguez permítelle pasar do 5º ao segundo posto, o cal ocupa con 22 puntos, 12 menos que o líder que segue sendo, unha semana máis Jose Vigo. No resto da clasificación poucos cambios.

Liga Feminina.- Xa falamos da impresionante bolada de Carmen Roca, quen conseguiu en Vilachá a súa terceira vitoria consecutiva, sendo a primeira muller en pasar dos 100 puntos nunha tirada. Estamos realmente impresionados con Carmen Roca, pero tamén con Dolores Baño e Marta Álvarez, quen veñen realizando un gran campionato. Estas tres xogadoras ocupan as tres primeiras posicións, demostrando, semana a semana, un nivel superior ás demáis xogadoras.