O BNG de Mondoñedo volve a denunciar o deterioro e a mala imaxe que sofren os espazos públios da cidade

Mondoñedo, 10 de xullo de 2017. Comezada oficialmente a temporada estival, o BNG de Mondoñedo volve unha vez máis a denunciar a situación de falta de limpeza que sofren espazos públicos e zonas verdes da cidade.

O grupo municipal do BNG demanda do goberno municipal do Partido Popular máis medios humanos e materiais así como unha maior eficacia na xestión de espazos públicos, zonas verdes e ornato público, xa que considera que os operarios do concello están “desbordados” ante tanta carga de traballo.

Para o portavoz do BNG, Eloi Cabanas, “esta situación é unha fonte constante de queixas e reivindicacións das veciñas e veciños dos diferentes barrios da cidade” e piden unha solución para que se corrixa canto antes esta situación.

Segundo o edil do BNG, “os valados instalados no Campo dos Paxariños, están aínda sen desmontar máis de dous meses despois das feiras das Quendas, as silvas dificultan o paso dos viandantes pola rúa San Roque ou a rúa da Ponte, que presenta un estado de esquecemento, son algúns exemplos dos que nos podemos encontrar se damos unha volta pola cidade”.

O voceiro nacionalista considera que “se Mondoñedo quere ser un referente turístico non pode permitirse este estado de mantemento tan lamentable e bochornoso” .

-LIMPEZA URXENTE DOS BAÑOS PÚBLICOS DA ALAMEDA DOS REMEDIOS-
O BNG denuncia tamén o estado de limpeza no que se encontran os baños públicos da Alameda dos Remedios e esixe ao goberno municipal que tome as medidas necesarias para desinfectar e adecuar os mesmos. “É vergoñento que veciños e veciñas que pasean pola alameda, nenos que xogan no parque ou persoas que van ao Centro de Saúde teñan que utilizar estes aseos nestas condicións de tanta sucidade”.

-O BNG PIDE CELERIDADE E CONCRECIÓN NO REMATE DAS OBRAS DE MELLORA DA PRAZA DOS MUÍÑOS-
O BNG faise eco das queixas que lle transmiten os veciños e veciñas do barrio e apunta que as obras non avanzan coa rapidez coa que lles prometera a alcaldesa Elena Candia. Segundo o portavoz do BNG “estas obras xa ían estar rematadas para a Feira de Artesanía” así que pide “celeridade” no avance dos traballos para que estes estean rematados antes da celebración das festas que se van celebrar neste barrio o 25 de xullo.