A Xunta de Persoal da Área Sanitaria da Mariña fai un chamamento a participar masivamente na manifestación que terá lugar en Compostela o domingo día 4 de febreiro

Burela, 26 de xaneiro de 2018. A modificación da Lei de Saúde formulada polo PP, denuncian, o que pretende “é centralizar no gran hospital as intervencións cirúrxicas e as probas diagnósticas”. Dende a Xunta de Persoal rexeitan “enerxicamente” pertencer a Área Sanitaria de Lugo, xa que iso significa centralizar os recursos sanitarios na capital e incrementar os desprazamentos da cidadanía da Mariña cara Lugo.
“A Mariña precisa ser un área propia con capacidade de decisión tal e como o é a Comarca do Ferrol”, sentenzan.
Dende a Xunta de Persoal entenden que o obxectivo do PP con esta reforma é avanzar nas políticas de desmantelamento da sanidade pública -dando cabida á iniciativa privada-, provocar unha perda de servizos no Hospital da Costa, dificultar a accesibilidade aos servizos sanitarios, desmantelar a atención primaria, reducir o número de traballadores/as e precarizar as súas condicións laborais.
As consecuencias da centralización sanitaria xa se viña percibindo na Mariña na forma de perdas de servizos. Así, nos últimos tempos comezouse a derivar a Lugo desde Burela a implantación de marcapasos e inclusive o cambio de pilas dos mesmos, os partos de prematuros ou os múltiples, malia contar o Hospital da Costa  con unidade de prematuros, a maioría das operacións de cataratas, hernias ou fimose, e as cirurxías programadas de traumatoloxía.
Os grandes beneficiados da reforma sanitaria impulsada polo PP son os hospitais privados da cidade de Lugo. “A conta de resultados dalgúns destes centros, como o Polusa ou a Nosa Señora dos Ollos Grandes, que curiosamente acometeu recentemente unha importante reforma das instalacións, non paran de medrar a medida que se reduce a carteira de servizos do hospital de Burela” afirman.
Por todo o anterior dende a Xunta de Persoal fan un chamamento á sociedade mariñá e ás traballadoras e traballadores da sanidade pública da comarca a participar masivamente na manifestación que terá lugar en Compostela o domingo día 4 de febreiro en Santiago, manifestación que apoiarán loxísticamente con autobuses.