Burela 10-3-18. O Pescados Rubén Burela FS e Vista Alegre dixeron adeus ás pantasmas das tres últimas xornadas recuperando as boas sensacións e os tres puntos ante CD UMA Antequera (5-2). Os de Juanma Marrube, que chegaron a dispoñer de vantaxe de 3-0 na primeira parte, impuxéronse con fame de gol e mostrando o seu principal sinal de identidade, a solvencia defensiva, fronte a un rival con perigo no xogo de pivote e en estratexia.
Superado o ecuador da primeira parte Colacha anotou o 1-0, nun potente dispaso raso en carreira. Antes Pope, no 4 e o 8, tivera dous de ouro. Con máis de cinco minutos para o descanso, os de Juanma Marrube souberon manexar a acumulación de faltas; lonxe de amilanarse seguiron no seu empeño de buscar a rede rival. No minuto 17, e con tan só 40 segundos de diferenza, o Pescados Rubén ampliou a fenda ao 3-0, con Pope e Luisma, tras dous perigosísimos avisos de Chus. No 19 Luisma estrelouse contra Coejo e foi o Antequera o que aproveitou para recortar distancias a falta de 44 segundos para a bucina nun rexeite cazado por Juanra tras saque de esquina.
Os andaluces volveron máis enchufados. Pero Héctor tamén regresou ao parqué con ganas de gol; no 25 tivo unha grande oportunidade a balón parado. Aguantou Edu as embestidas visitantes e volveu aparecer o 20 mariñán para non errar e rubricar o cuarto, nunha recuperación. O Antequera mantívose no partido con nova aparición de Juanra, de disparo afastado, de novo de estratexia, no minuto 30, con 4-2. Alternancia baixo paus, con insistencia de Renato e un Edu impasible ante Miguel Conde e Juanra, ata que chegou o quinto laranxa con firma de Pope, no 37, que tan só tivo que empuxar un centro de Hélder. Entón, Miguel Conde quixo liderar a tentativa de remontada para os andaluces. Vista Alegre viviu os últimos segundos con ataque de cinco dos burelistas, con Chus á fronte.
Descanso ata o 24 de marzo
A Copa de España Comunidad de Madrid 2018 dará unha semana de descanso á liga de Segunda LNFS. O Pescados Rubén Burela FS regresará o 24 de marzo con outro duelo directo, na pista do Puertollano.
Ficha técnica
Pescados Rubén Burela FS: Edu, Luisma, Chus, Colacha, Pope, cinco inicial; tamén xogaron Víctor, Hélder, Renato, Héctor, Cora
CD UMA Antequera: Conejo, Carlos Corredera, Miguel Conde, Dani Ramos, Miguel Fernández, cinco inicial; tamén xogaron Óscar, Cala, Crispi, Juanra, David Velasco, Dani Aguilera
Goles: 1-0, minuto 11, Colacha; 2-0, minuto 17, Pope; 3-0, minuto 17, Luisma; 3-1, minuto 20, Juanra; 4-1, minuto 28, Héctor; 4-2, minuto 30, Juanra;
Árbitros: Miguel Velasco, F. // Miguel Velasco R. (Castela e León). Por Burela amarela para Renato, Héctor. Por Antequera, amarela para Dani Aguilera
Incidencias: Partido correspondente á xornada 24 de Segunda LNFS, disputado no pavillón Vista Alegre de Burela ante unhas 900 persoas. Minuto de silencio inicial en recordo do auxiliar de Movistar Inter, Cecilio Rodríguez