Nuns días será presentada a programación das 25 Xornadas Técnicas Expomar. A comisión organizadora reuníuse nas últimas horas para pechar o evento

Burela, 11 de abril de 2018. A comisión organizadora reuníase nas últimas horas para pechar o programa da 25 edición das Xornadas Técnicas Expomar que terán lugar os días 3 e 4 de maio en Burela. O alcalde e presidente da Fundación Expomar, Alfredo Llano, subliña que en breve se fará a presentación do programa deste evento.
O rexedor explicou que “onte tivemos a reunión de Expomar para confeccionar e ir mirando como vai todo cara ao día 3 e 4 de maio, que é cando se vai facer esta 25 edición de xornadas técnicas e do encontro de empresarios de pesca”.
Llano asegurou que “practicamente está o programa xa culminado, o único que nos queda é confirmar a algún dos conferenciantes. Daremos o programa o antes posible e faremos unha presentación calculo que na segunda quincena deste mes”.
O presidente da Fundación Expomar sinalou que “os temas que se van tocar o xoves, dia 3, son as políticas pesqueiras en xeral como o brexit e o impacto no sector pesqueiro galego, sobre todo na nosa comarca. Outro tema serán os novos plans de xestión pesqueira en España porque tamén están preocupados a ver como queda o sistema de cotas e unha serie de asuntos que loxicamente preocupan moito ao sector. Tamén se vai tratar a visión do sector pesqueiro, dos armadores e os traballadores do mar, con respecto ao que está acontecendo agora en Europa e como lles vai afectar todo isto”.
Alfredo Llano relatou que “o venres 4 vanse abordar os hábitos de consumo, nutrición e trazabilidade. O segundo día queremos orientalo a toda aquela persoa que teña interese en como se fai co peixe, como se comercializa, e o mellor do peixe no aspecto nutritivo. Trataremos que sexa enfocado ao público en xeral, que veña toda aquela persoa que teña algún tipo de interese no que consume, en qué propiedades ten o consumo do peixe e en qué beneficia. Trataremos a importancia do pescado na dieta, o etiquetado, a información ao consumidor e todo aquilo que teña que ver co comercio, co consumo e coa nutrición. Tamén falaremos do comportamento dos consumidores nos mercados europeos. Hai enquisas que se fixeron en diferentes países europeos nas que din que todo o mundo estaría de acordo en consumir peixe dunha forma sostible, ou sexa que todo aquilo que se pesca, como se pesca aquí en Burela, de forma sostible e o que quere a xente”.
O presidente da Fundación Expomar engadiu que “posiblemente despois do día 15 deste mes faremos unha presentación para ir motivando á xente a participar nesta nova edición das xornadas técnicas e do encontro empresarial”.