Pilar Armada aféalle ao PSOE que tente confudir á veciñanza ao difundir uns prezos do centro de día residencia que “non se axustan para nada á realidade”

Cervo, 18 de xuño de 2018.- A edil de Servizos Sociais, Pilar Armada, afeoulle ao PSOE de Cervo “que tente confundir á veciñanza ao difundir uns prezos do Centro de Día Residencia que non se axustan para nada á realidade”.
Non sabemos que obxectivo persegue o voceiro deste grupo xogando así ao despiste “cremos que é un xesto irresponsable enganar aos potenciais usuarios cun tema tan importante”; sabendo como sabe, ademais, que “a oferta económica da empresa que resultou adxudicataria do servizo presenta unhas tarifas que van desde os 990 aos 1.320 euros (IVE incluído), en función do grao de dependencia dos usuarios”. En ningún caso –recalcou- os beneficiariarios deberán abonar 1.500 euros, como apuntan, consciente e erroneamente, desde o PSOE.
Armada recordou, así mesmo, que este infraestrutura social está pensada e dirixida para toda a veciñanza do Concello de Cervo, que terá prioridade de acceso, e recordoulle ao voceiro do Partido Socialista “que o modelo de servizo público autonómico de axudas sociais que se aplica a día de hoxe é, aínda que mellorado, o mesmo que cando gobernaba o bipartito”. A concelleira criticou tamén a falta de pudor dos socialistas que “teñen o descaro de falsear cifras e datos sobre un servizo que vai entrar en funcionamento nos vindeiros días grazas ao esforzo económico da Xunta de Galicia do Partido Popular e do goberno municipal”, e recordoulles que “o PSOE non mobilizou nin un só euro para a esta residencia tan importante para para todos os cervenses”.
Armada quixo poñer así mesmo no seu coñecemento, que se a Deputación Provincial dispón unha partida de axudas dirixida aos usuarios deste tipo de centros, por suposto que desde Cervo imos sumarnos e solicitala, porque non se entendería ningún tipo de discriminación nesta materia, “todos os cidadáns gozamos dos mesmos dereitos, e por tanto defendemos a equidade tamén ante calquera tipo de axuda pública”.