Aparece no programa electoral do partido popular a promesa de realizar obras de mellora e mantemento no CEIP Juan Rey: caldeira nova, renovación do peche exterior (fiestras e portas), acceso cuberto ao patio e ao polideportivo.
Todas estas melloras están recollidas nun acordo plenario no que se insta á Consellería de Educación á realización das mesmas.
No pasado mes de febreiro, o delegado territorial da Xunta anunciaba nos medios de comunicación que se aprobara o cambio da caldeira da calefacción. Nestes casos, a Xunta sempre empeza a casa polo tellado. De nada serve cambiar a caldeira se primeiro non se acomete a reforma do peche. Fixeron o mesmo cando cambiaron o chan do polideportivo, poñendo parqué, sen tapar antes as goteiras da cuberta.
Hai poucos días, volvía o Sr. Balseiro a anunciar na prensa novas obras en distintos centros educativos da Mariña. O colexio de Lourenzá non aparece no listado, polo que todas as deficiencias que presenta o centro seguirán sen solucionar.
Nas promesas que aparecen no programa electoral do PP falan do acceso cuberto ao patio. Será erro ou descoñecemento porque ese xa está feito, grazas á Deputación. A cuberta que se solicitaba era a da entrada principal, obra moi necesaria polo risco que supón cando as escaleiras de acceso están molladas en días de chuvia. Desde o Concello levamos xa tres anos pedindo unha subvención á Xunta de Galicia para acometer esta obra. Hoxe recibimos a triste noticia de que un ano máis nos era denegada.
Fixo algo o partido popular local nestes anos para presionar á Xunta e poder levar a cabo esta obra tan necesaria? Nada de nada…
Desde o Partido Socialista de Lourenzá comprometémonos, no caso de volver a recibir o respaldo dos veciños e veciñas, a realizala no menor tempo posible, aínda que sexa sen a colaboración da Xunta de Galicia, que é a responsable directa das obras de mellora dos centros educativos, xa que aos concellos correspóndelles o seu mantemento.
ÚLTIMA HORA
- Burela pon en marcha o Espazo Zero para previr a soidade non desexada na mocidade
- Dende o martes, 13 e ata o venres, 16 de outubro, ambos incluídos, permanecerán cortados ao tráfico varios treitos da estrada provincial LU-P-2601 debido ao inicio dos traballos de aglomerado en quente nesta vía que comunica Xove co Portiño de Morás
- Miles de persoas enchen Viveiro na gran festa do comercio local
- O rural galego a través das mulleres: investigación, arqueoloxía e memoria únense en Mondoñedo
- Dende o martes, 13 e ata o venres, 16 de outubro, ambos incluídos, permanecerán cortados ao tráfico varios treitos da estrada provincial LU-P-2601 debido ao inicio dos traballos de aglomerado en quente nesta vía que comunica Xove co Portiño de Morás
Os cortes produciranse do punto quilométrico 2,800 ao final da vía. Habilitaranse desvíos alternativos que estarán debidamente sinalizados. - A Deputación abriu o prazo do IX Concurso de Fotografía polo 20 aniversario da Reserva da Biosfera dos Ancares Lucenses, con premios de 800, 500 e 300 euros para imaxes que reflictan a riqueza natural e cultural do territorio
Cada participante pode presentar unha única fotografía, en papel e formato dixital, seguindo as bases dispoñibles na web da Deputación. A celebración do aniversario inclúe actividades como a Xornada de Degustación da Tenreira de Ancares, unha xornada micolóxica e un obradoiro de rescate na montaña, ademais doutras propostas ambientais e divulgativas nos próximos meses. - Evacuadas doce persoas dun tren detido no interior dun túnel debido a unha chapa na vía en Mañón
Dez minutos antes das 21:30 horas do xoves, o 112 Galicia foi informado polo persoal de Adif dun tren detido no medio dun túnel en Mogor, Mañón, debido a unha chapa metálica no medio da vía. Así, aínda que as doce persoas que viaxaban a bordo estaban ilesas, precisaban medios de rescate para baixalas do convoi e desprazalas ata o apeadeiro máis próximo. Nestas tarefas colaboraron a Garda Civil, os Bombeiros do Eume, o GES de Ortigueira e os voluntarios de Protección Civil de Mañón. Finalmente, as persoas foron rescatadas e evacuadas a outro tren, que as levou ata o apeadeiro sen maiores complicacións. Desde alí, continuaron a súa viaxe en taxi. - Dúas alumnas do IES de Foz, Marta Chao e Kiara Cabado, de segundo curso do Ciclo Medio de Cociña, participarán a vindeira semana no 25 Campionato Mundial de Pizza Picante en Calabria (Italia)
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa. - Mondoñedo celebrará o sábado 17 de outubro unha homenaxe a Xosé Vizoso no Auditorio Municipal Pascual Veiga
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo. - Do 16 de outubro ao 15 de novembro, Mondoñedo acolle Gardiáns, o proxecto do fotógrafo lucense Jorge Arévalo que ofrece unha mirada íntima ás nosas razas autóctonas e á profunda conexión entre as persoas e os animais na nosa terra
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas. - Xurxo Souto volveu enchoupar Ribadeo coa súa enerxía creativa nun encontro celebrado o pasado venres, 2 de outubro, polas rúas da vila e na Biblioteca Municipal El Viejo Pancho, organizado pola A.C. Francisco Lanza
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
2021 Crónica 3 A Mariña - Implementado por GaliciaDigital