Nos últimos tempos estamos a ver como Galiza se convirte nun deserto industrial que como non, tamén afecta á industria electrointensiva e ao seu amplo número de postos de traballo, que tras meses de mobilizacións aínda non recibiron resposta en condicións, e o certo é, que estamos aínda lonxe de que a situación sexa satisfactoria e de que nos traten ás galegas e galegos como merecemos.
Os sinais de alarma na planta de Alcoa San Cibrao disparáronse dende o momento en que se decidiu parar 32 das 512 cubas, e que tras unha visita-fracaso da Ministra Reyes Maroto e o Presidente da Xunta Nuñez Feixóo, xa hai rumores de que ese número vaia aumentar en breve, en definitiva, son o mellor autorretrato da incapacidade e desinterese que teñen para resolver os problemas das galegas e galegos. Somos produtores e excedentarios en enerxía, tamén asumimos a contaminación desta produción eléctrica, e somos os galegos os peores parados en materia enerxética?
A actividade desta fábrica é o motor económico fundamental para esta comarca, e si para a súa subsistencia Alcoa precisa de axudas públicas, terán que ser coa condición de que modernicen a factoría. Non pode ser que cada certo tempo se lle entreguen axudas e se lle abaraten os prezos para mellorar a súa competividade, e que non se lle obrigue a invertir na fábrica de San Cibrao. Terán que ser axudas coa condición de que invistan en mantemento, modernización e melloras, tanto para a fábrica como nas condicións laborais da clase traballadora.
Dende o BNG insistiremos sempre na nosa demanda dunha tarifa eléctrica galega, que permitiría o aforro nos fogares galegos e gañar en competitividade nas nosas industrias, e tamén pedimos á Xunta de Galiza que asuma as súas responsabilidades coa industria galega e actúe máis alá de declaracións electoralistas. Que se deixen de vetar sistematicamente todas as propostas do BNG para abaratar a electricidade e traballen polo ben do país galego, estamos ante a peor crise industrial e non poden continuar botando balóns fóra cando Galiza o que precisa son solucións.
Por último, animar a todo Viveiro, a tod@s @s mariñans e en definitiva a toda a provincia de Lugo a acudir á manifestación convocada polo comité de empresa para o vindeiro día 3 en Viveiro. Alí nos vemos!
Míriam Bermúdez, concelleira do BNG de Viveiro.
Dez minutos antes das 21:30 horas do xoves, o 112 Galicia foi informado polo persoal de Adif dun tren detido no medio dun túnel en Mogor, Mañón, debido a unha chapa metálica no medio da vía. Así, aínda que as doce persoas que viaxaban a bordo estaban ilesas, precisaban medios de rescate para baixalas do convoi e desprazalas ata o apeadeiro máis próximo. Nestas tarefas colaboraron a Garda Civil, os Bombeiros do Eume, o GES de Ortigueira e os voluntarios de Protección Civil de Mañón. Finalmente, as persoas foron rescatadas e evacuadas a outro tren, que as levou ata o apeadeiro sen maiores complicacións. Desde alí, continuaron a súa viaxe en taxi.
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
