CERVO.- O grupo municipal do BNG presenta no concello unha de solicitude para revisión do acordo da Xunta de Goberno Municipal de 2 de maio polo que se concede licenza de edificación para 60 vivendas nunha parcela situada entre as Rúas Os Baos, Galiñeira e Bellavista en San Cibrao. Indican que “o recurso asinado tamén por veciños da zona ven motivado polo incumprimento de artigos das Normas Subsidiarias de Planeamento de Cervo o que situaría esta promoción na inseguridade xurídica afectando tanto a promotor como a futuros compradores e veciños da zona”.
NOTA DE PRENSA REMITIDA:
O GOBERNO MUNICIPAL SEGUE XOGANDO CON LUME NA XESTION DO URBANISMO EN CERVO.
No mes de maio a Xunta de Goberno concedeu licenzas de edificación para 110 vivendas en solo cualificado como Residencial Mixta sen o Estudo de Detalle preceptivo que esixen as Normas Subsidiarias de Planeamento.
A concesión desas licenzas nestas circunstancias sitúa na inseguridade xurídica tanto a promotores como a futuros compradores.
As Normas Subsidiarias de Planeamento que rexen o urbanismo en Cervo dende 1978 determinan no artigo 4.3.4 o Estudo de Detalle como instrumento para a ordenación en Residencial Aberta ou Pechada en solos con ordenación Residencial Mixta.
O pasado 2 de maio a Xunta de Goberno Local concedía licenza de construcción para 110 vivendas en tres promocións, en tódolos casos en solos con Ordenanza RM Residencial Mixta, sen esixir aos promotores o Estudo de Detalle preceptivo para a cualificación en Residencial Pechada ou Aberta, como discrecionalmente se decidiu neste caso ao marxe da normativa e situando estas promocións na inseguridade xurídica.
Sentencia de 8 de abril de 2008 do Tribunal Supremo (Caso Lodeiro)
A sentencia do Tribunal Supremo de 8 de abril de 2008 daba aprobación a outra do TSXG no que se anulaban dúas licenzas de construcción e ordenaba a demolición de varios edificios no Concello de Viveiro ao non atender este último a reclamación dun particular contra acordos da Comisión de Goberno do concello de Viveiro que outorgaban tales licenzas en solo considerado nas NSP como Residencial Mixta sen aprobar o preceptivo Estudo de Detalle.
A continuación dun perigoso camiño de inseguridade xurídica
O goberno municipal de Cervo segue transitando por camiños de dubidosa legalidade en todo o que ten relación coa xestión urbanística e non pode seguir amparándose en informes técnicos que unha e outra vez cando menos semellan imprudentes e poñen en cuestión a seriedade da administración pública cervense ademais de provocar serios problemas ao conxunto dos veciños e veciñas de Cervo. A concesión de licenzas de dubidosa legalidade provocan inseguridade xurídica e non só poñen en perigo a inversión de promotores privados e futuros compradores senón tamén ao propio concello que podería ter que indemnizar no caso de producirse a súa anulación por ser contrarias a dereito.
Reclamamos a axilización dos Trámites do Plan Xeral.
O BNG segue a reclamar a axilización dos trámites para a redacción do PXOM que o Partido Popular no goberno municipal tivo paralizado durante anos após a presentación pública do avance no ano 2004. Agora o concello conta cunha nova axuda de Política Territorial para a elaboración do PXOM por importe de 80.000 euros na que segundo o cronograma disposto este debería estar aprobado definitivamente no ano 2012, aínda que o concello debería adiantar os prazos tendo en conta o retraso acumulado e así o reclamamos dende o BNG tendo en conta a caducidade das NSP e os continuos problemas que xeneran.
Iniciativa do BNG e un grupo de veciños.
O BNG e un grupo de veciños da zona presentará solicitude de revisión dunha delas para a construción de 60 vivendas, na Rúa Bellavista, Rúa Os Baos que consideramos contraria ao ordenamento urbanístico vixente ao non aplicarse o Art. 4.3.4 das N.S.P. sobre o preceptivo e inexistente Estudo de Detalle en solos cualificados como Residencial Mixta. Ademais a Rúa os Baos, inexistente nas Normas Subsidiarias, non fará posíbel a Acta de Replanteo a non ser que o Técnico Municipal a efectúe ao marxe da legalidade, xa que o paso previo de incluír esa rúa nas N.S.P. non se produciu. Hai que lembrar que no ano 2005 o goberno municipal aprobou provisionalmente neste mesmo quinteiro un Estudo de Detalle que foi anulado no período de alegacións por recursos promovidos polo BNG e os veciños ao deixar fora de ordenación as súas vivendas, na maior parte unifamiliares sen terlles comunicado a aprobación dese instrumento urbanístico tal como establece o Art. 86.2 da LOUGA. Non se entende agora como no 2005 era preciso a aprobación dun Estudo de Detalle e no 2008 non.
A concesión de licenzas de construción é un acto regrado no que a administración unicamente ten que verificar que o proxecto de execución está conforme á legalidade urbanística existente. Neste caso entendemos que se conculca a legalidade ao non cumprirse no proxecto as esixencias das N.S.P. e por tanto de non modificarse de oficio estarían situando esta promoción nunha inseguridade xurídica con graves consecuencias futuras tanto para promotores como para futuros compradores. A sentencia de Lodeiro emitida en primeira instancia polo TSXG e despois polo Tribunal Supremo debería facer reflexionar tanto ao técnico municipal de Cervo como á Xunta de Goberno Local que lonxe de tela en conta, actúan reiterando erros anteriores un mes despois de coñecerse as consecuencias.
En base ás argumentacións xurídicas correspondentes o Grupo Municipal do BNG estuda presentar unha solicitude de revisión dunha primeira licenza para 60 vivendas na Rúa Bellavista, Rúa Os Baos e a declaración de oficio de nulidade do acordo da Xunta de Goberno Local de 2 de maio de 2008 a fin de obter as máximas garantías de legalidade evitando a inseguridade xurídica desta promoción. Ademais esiximos ao goberno municipal o cumprimento da legalidade das outras dúas aprobadas na mesma Xunta de Goberno Local.
Cervo, 10 de xullo de 2008.
Asdo.: Xoán Antonio Estúa García.
Concelleiro-portavoz do BNG.
A piscina abrirá de luns a venres de 8:30 a 13:00 e de 15:30 a 22:00, e os sábados de 8:30 a 14:30. O ximnasio manterá horario continuo de luns a venres, de 8:30 a 22:00, e os sábados de 8:30 a 14:30. A tempada arrinca tras diversas melloras nas instalacións, entre elas a renovación da cuberta do polideportivo, cun investimento de 195.000 euros, así como a substitución de portas de emerxencia, a intervención en pontóns das piscinas e o cambio das huellas de volteo. O Concello continúa así reforzando o mantemento e a seguridade dun complexo utilizado diariamente por numerosos veciños e deportistas.
Este luns, 14 de setembro, visitaron Mondoñedo, a Praia das Catedrais e Santa Cruz. A viaxe evocou as lecturas de Cunqueiro e as súas Crónicas do sochantre, nun percorrido que incluíu a catedral mindoniense e o barrio dos Muíños, ademais da emblemática praia de Augas Santas. Pola tarde participaron nunha exhibición de billarda grazas á estimable colaboración dos billardeiros da comarca. O martes partiron de regreso a Loktudi.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Este luns, 14 de setembro, deu comezo un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
A programación arrancará de 13:00 a 15:00 horas cos pinchos de benvida e unha sesión vermú a cargo do DJ Peabody. A continuación, de 15:00 a 17:00 horas, terá lugar a comida na Finca San Antonio, cun menú composto por salpicón de rape e langostinos, codillo con patacas, pan, postre, café, chupito e bebida incluída. Os tickets teñen un prezo de 40 euros e poden adquirirse en O Rincón, Confitería Alianza, Comercial Anjor e Perruquería Oriola; os menores de 5 anos asistirán de balde e os de 6 a 10 anos contan cun desconto do 50 %. Xa a partires das 18.30 horas haberá sesión de música con Toxo Guayaba.
