BURELA.- O pleno do Concello de Burela que se celebrará o 29 de outubro someterá a aprobación as taxas municipais para 2009. O goberno municipal propón a conxelación de taxas coma: a entrada de vehículos a través de beirarrúas (os tradicionais valados); as da escola de música; as de licencias de autotaxi, sumidoiros, vehículos de tracción non mecánica, cemiterios municipais e auga, ademais da axuda a domicilio.
A concelleira de Economía e Facenda, Remedios López Villar, explica no caso da escola de música “que xa o ano pasado fixemos unhas melloras importantes con bonificacións moi interesantes que nos permiten este ano conxelar posibles incrementos nesta taxa. Agora temos máis alumnos e a escola está a funcionar moi ben. Hai que lembrar que teñen bonificacións dun 25% os censados en Burela e dun 50% o 2º membro da unidade familiar que estude nesta escola e que ademais están exentos de pagar as taxas os membros da banda de música”.
Subirán o IPC: a recollida do lixo, os tendidos de tubaxes, as licencias urbanísticas, a ocupación de terreos públicos, estadas e valados…
Barco museo
Tamén subirá en 0’5 euros o acceso ao barco museo. Os prezos quedarán da seguinte maneira: os adultos pagarán 2 euros; os rapaces de 12 a 18 anos e os pensionistas pagarán 1’5 euros; os grupos concertados de máis de 20 persoas deberán abonar tamén 1’5 euros e os menores de 12 anos e os colexios seguirán a entrar gratis. López Villar di que “estes prezos non se poden comparar cos doutros museos e instalacións que se visitan por aí adiante e que custan 7 ou 8 euros. Isto é unha ganga”.
IBI
A edil socialista anuncia tamén unha baixada do IBI no 2009 “é a primeira vez na historia do Concello de Burela na que este imposto estará por debaixo do 5%. Cando este Concello botou a andar estaba nesa porcentaxe, e despois o responsable de Economía daquel momento Sergio López subiuno ata o 6%, e despois baixárono medio punto e nós imos baixala outro medio punto”. O imposto do bens inmobles urbanos baixa un 0’45% e o imposto de bens inmobles rústicos baixa un 0’55%. López Villar asegura que “o anterior equipo de goberno foi o que solicitou unha revisión catastral e nós cando chegamos ao Concello ese proceso xa estaba en marcha e iso leva consigo unha suba de valor nos 10 anos seguintes. Nós baixamos o IBI, algo que é moi importante para o pobo e moi beneficioso”.
A concelleira de Economía e Facenda lembra que o paso de carruaxes xa non existe en Burela “os que teñen a placa o único que lles autoriza é a rebaixar a beirarrúa, pero o paso de vehículo non está reservado. Para iso está a denominada entrada de vehículos a través de beirarrúas”.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continúa con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
Finalizado o encontro, de carácter privado, o Cónsul asinou no Libro de Ouro da Deputación e a Presidenta fíxolle entrega dun agasallo institucional. Trala xuntanza Carmela López manifestou a súa satisfacción porque “traballamos para avanzar en novas vías de colaboración, e en posibles proxectos que serven para reforzar a relación entre a Deputación e o veciño país de Portugal”.
