A oficina de información atendeu 100 visitas diarias, asegura o concelleiro de Turismo de Burela

BURELA (FNC).- A Delegación de Turismo do Concello de Burela da que é responsable José González Legazpi fai unha avaliación obxectiva sobre os pasados días festivos que “incidiron na importancia do turismo de proximidade, do que se ven facendo mención nos recentes estudos e programas vencellados ao mesmo polos sectores implicados para a consecución dunha máis grande capacidade turística fundamentada na desestacionalización”.
Segundo González Legazpi “dende a Oficina de Turismo de Burela, se ten rexistrado nestes tres días festivos unha afluencia de visitantes de proporcións semellantes ás do verán, xa que logo  preto de cen persoas diarias estiveron interesándose polo noso Concello e tamén pola Comarca da Mariña. Destacar que a procedencia maioritariamente foi da nosa comunidade autónoma,  principalmente do eixe atlántico, seguida da comunidade asturiana e tamén moi representativa foi a afluencia de persoas chegadas dende a capital de España, e do norte peninsular, concretamente de Cantabria e do País Vasco, pero tamén de Castela-León. En definitiva acredítase o interese do turismo de cercanía que na actual coxuntura económica ten unha maior posibilidade de acomodación para o visitante”.
O delegado de Turismo de Burela destaca “este avance significativo en tanto que determina claramente e de modo positivo o resultado do traballo que se ven facendo na divulgación e participación en certames, de ámbito indistinto, o que fan posible o achegamento de visitantes ao noso Concello en épocas non estacionais como foron estes pasados festivos de semana santa, e que tamén representa unha condición positiva para os sectores socioeconómicos locais e un avance progresivo nas políticas de  afianzamento na desestacionalización e por consiguinte no desenvolvento xeral do turismo no Concello de Burela”.