Burela presentará alegacións ao Plan de Ordenación do Litoral porque a “machaca urbanisticamente”

BURELA (FNC) .- A tenente de alcalde e voceira do BNG no Concello, Neves Cando, asegura que o Plan de Ordenación do Litoral machaca urbanisticamente a Burela e anuncia a presentación de alegacións.

A edil nacionalista explica que “das aproximadamente 800 hectáreas que ten o noso concello, este Plan de Ordenación do Litoral afecta en Burela a 732 das que 413 hectáreas se sitúan por riba da franxa dos 500 metros. É dicir agora a Xunta do PP incrementa de por vida esta afectación moi por riba dos 500 metros estipulados polo goberno anterior que eran de carácter provisional ata a aprobación dos plans xerais dos Concellos”.

Neves Cando sinala que “Burela, un concello cunhas peculiaridades moi específicas porque se ve afectada por FEVE, por Costas, pola variante e polo futuro corredor da costa, vese agora hipotecada definitivamente para o seu desenvolvemento urbanístico. Un total de 112 hectáreas, é dicir máis dun millón de metros cadrados van ter prohibidas todo tipo de construción residenciais. Resulta afectada toda a zona da Marosa onde se prohiben tamén instalacións deportivas pechadas, co cal todos os terreos comprados alí polo Concello non poderán ser utilizados para un futuro complexo deportivo. E tamén están incluídos aquí os terreos de Foxo nos que non se poderá construír vivenda protexida, como sí pretendía o plan sectorial do anterior goberno galego”.

Á tenente de alcalde resúltalle curioso “nestas zonas a Xunta do PP si permitirá construír hoteis para talasoterapia ou spas. E preguntámonos porqué isto si e as instalacións deportivas non, que intereses hai aquí, pero aínda máis porque a zona industrial dereita do Perdouro vindo desde Foz queda afectada como zona de mellora ambiental e paisaxística, e sen embargo na esquerda non. Aquí prodúcese unha grande discrecionalidade que vai impedir o crecemento dunha marxe e da outra non”.

Cando subliña que “este plan tamén vai prohibir usos residenciais en solo que no noso planeamento actual teñen a consideración de urbanizables. De máis de 350.000 metros cadrados de solo urbanizable que tiñamos clasificado 320.000 estaban na franxa dos tan criticados 500 metros de costa, pero agora outros 28.000 metros cadrados máis se aumentan por riba desa franxa. O Plan de Ordenación do Litoral para Burela establece usos de solos sen atender a criterios regrados, sen mostrar ningún coñecemento da realidade xeográfica do noso concello. Parece que se planifica aquí urbanísticamente igual que na Costa do Sol, preséntanse solucións distintas para realidades que son iguais, propóñense excepcionalidades noutros concellos e aquí non, a pesares das nosas peculiaridades territoriais e creando unha inseguridade xurídica tanto a nivel de propietarios como de Concello”.

A voceira do BNG no Concello e tenente de alcalde considera que “o PP tenlles que explicar aos veciños e veciñas de Burela todo isto e empezar por recoñecer as súas mentiras na campaña electoral e as posteriores á presentación deste plan, pois está a prohibir construír por riba dos 500 metros facendo definitivo algo que antes era provisional. Zonas actuais de Burela de expansión urbanística como son A Marosa, Vilar, A Casilla, Foxo, O Cantiño ou o mesmo Perdouro quedan con este Plan do Litoral do PP hipotecadas urbanísticamente de maneira definitiva e ante isto non imos quedar calados e imos alegar contra este plan que machaca urbanísticamente a Burela”.