O alcalde de Cervo anuncia que a primeira fase do saneamento de San Cibrao non entrará en servizo

Nota de prensa

O CONCELLO DE CERVO AMOSA A SÚA SATISFACCIÓN POLO INMINENTE REMATE DAS OBRAS DA PRIMEIRA FASE DA NOVA REDE DE SANEAMENTO DE SAN CIPRIÁN MALIA QUE LAMENTA QUE O RECORTE QUE O BIPARTITO FIXO NO SEU DÍA NO ORZAMENTO IMPIDA A SÚA ENTRADA EN SERVIZO

* Esta actuación fora substancialmente modificada debido á decisión adoptada durante o mandato do socialista Francisco Vázquez ó fronte da Consellería de Medio Ambiente da Xunta bipartita

* Os daquela responsables de Medio Ambiente decidiron rescindir o proxecto orixinal de 2005 e adxudicalo novamente por outro 2 millóns de euros máis barato

* Esta rebaixa orzamentaria trae consigo a imposibilidade de levar adiante a totalidade do proxecto orixinario e, por conseguinte, o novo saneamento de San Ciprián non poderá entrar en servizo tal e como lles gustaría ós responsables locais

Cervo, 22 de marzo de 2011.- O alcalde de Cervo, Alfonso Villares, amosou a súa satisfacción diante da inminente finalización da primeira fase da nova rede de saneamento de San Ciprián, cuxos traballos comezaron aló por agosto do 2009 e agora están a piques de rematar.

Recorte de 2 millóns do bipartito

A pesares desta boa nova, o rexedor non quixo tampouco ocultar algúns reparos á planificación desta nova infraestrutura. Ao fío disto lamentou o “inexplicable” recorte no presuposto da obra que no seu día impuxo unilateralmente o Goberno bipartito “e cuxas queixas este Goberno municipal xa transmitiu en máis dunha ocasión” indicou.

O primeiro edil lembrou que o proxecto orixinal fora aprobado en xuño de 2005 polo Goberno do Partido Popular na Xunta e pouco tempo despois fora adxudicado cun orzamento de 6,5 millóns euros, “pero nada máis chegar os socialistas e nacionalistas á Xunta decidiron anular o contrato de adxudicación sen razón algunha e finalmente recortaron o seu presuposto a 4,3 millóns de euros, recorte que operou en contra dos intereses dos veciños e veciñas de San Ciprián; por non falar dos 400.000 euros de indemnización que tiveron que pagar para rescindir devandita adxudicación” recalcou o primeiro edil cervense.

En opinión do rexedor local, esta decisión da Consellería de Medio Ambiente -que daquela dirixía o socialista Manuel Vázquez- debeuse a motivos estritamente políticos co obxectivo de prexudicar ao Concello de Cervo por non ser da súa mesma cor política e trouxo aparellado que o proxecto integral adxudicado no 2005 durante a época Fraga mudase para converterse por decisión do bipartito en so unha primeira fase do proxecto inicialmente deseñado. “Como consecuencia deste recorte orzamentario, hoxe tan só estamos a falar da finalización da primeira fase, e non da entrada en servizo do novo saneamento, como nos tería gustado presentar” recoñeceu Villares.

Parabéns á empresa

Ao marxe das criticas, o alcalde cervense quixo amosar o seu agradecemento á empresa encargada de desenvolver estas obras “porque os traballos que viñeron desenvolvendo en todos estes meses foron feitos cunha gran profesionalidade” indicou.